Sansar News
काठमाडौं । कोरोना भाइरस (कोभिड–१९)को महामारी बढ्दै गएसँगै सरकारले नियन्त्रणको उपाय खोज्न थालेको छ । लकडाउन खुला गरेसँगै महामारी व्यापक हुन जाँदा सरकार उपाय खोज्न बाध्य भएको हो ।
यसैबीच प्रधानमन्त्री केपी शर्मा ओलीले कोरोना नियन्त्रणको उपाय खोज्न विज्ञहरुलाई छलफलमा बोलाएका छन् । मंगलबार उनले विज्ञहरुलाई बालुवाटार बोलाएर छलफल थालेका हुन् । प्रधानमन्त्रीका प्रेस सल्लाहकार सुर्य थापाले जनाएअनुसार बालुवाटारमा अहिले छलफल सुरु भएको छ ।
थापाले जनाएअनुसार आजको छलफलमा २० जनाभन्दा बढि विज्ञको सहभागिता छ । सहभागीले कोरोना नियन्त्रणको उपायबारे आ–आफ्नो सुझाव राख्ने छन् ।
लकडाउन खुला गरेसँगै नेपालमा कोरोना संक्रमितको संख्या ह्वात्तै बढेको छ । काठमाडौं उपत्यका र तराईका क्षेत्रमा कोरोना संक्रमणले व्यापकता लिएको छ । समुदाय स्तरमा कोरोना संक्रमण देखिएसँगै सरकार नियन्त्रणको खोजीमा लागेको हो ।
उनले जनाएअनुसार सरकारले विज्ञहरुसँगको छलफलसँगै कोरोना नियन्त्रणबारे आगामी रणनीति तयार गर्नेछ ।
लकडाउन खुला गरेसँगै नेपालमा कोरोना संक्रमितको संख्या ह्वात्तै बढेको छ । काठमाडौं उपत्यका र तराईका क्षेत्रमा कोरोना संक्रमणले व्यापकता लिएको छ । समुदाय स्तरमा कोरोना संक्रमण देखिएसँगै सरकार नियन्त्रणको खोजीमा लागेको हो ।
हाल केहि दिनदेखि उपत्यका प्रवेशमा कडाई गरिनुका साथै कोरोना संक्रमण देखिएका तराईका केहि क्षेत्रमा लकडाउनका साथै कफ्र्यु पनि लगाइएको छ ।
वि.सं.२०७७ साउन २० मंगलवार १२:१४ मा प्रकाशित
