Sansar News
२० साउन, जनकपुरधाम । प्रदेश नं. २ मा पछिल्लो २४ घण्टामा ३६ जना व्यक्तिमा कोरोना संक्रमण पुष्टि भएको छ ।
जसअनुसार महोत्तरीमा १५ जना कोरोना संक्रमित भएकोमा १४ जना नेपाली सेनाका रहेका छन् । महोत्तरीमा संक्रमण पुष्टि भएकाहरुमा रणभीम गण प्रकौली ब्यारेक जलेश्वरमा कार्यरत १४ जना नेपाली सेनाका रहेका छन् ।
धनुषामा १२ जना, सप्तरीमा ७ जना, सिरहामा १ जना र सर्लाहीमा १ जना व्यक्ति संक्रमित भएका छन् ।
धनुषामा बैंक कर्मचारीमा पनि संक्रमण पुष्टि भएको छ भने स्वास्थ्यकर्मीमा पनि कोरोना देखिएको छ ।
यस प्रदेशमा मंगलबार मात्रै सप्तरीमा २ सय ८, सिरहामा १४, धनुषामा ७८, महोत्तरीमा ५१, सर्लाहीमा ३६, रौतहटमा ८६, बारामा ९५ र पर्सामा २८ जना गरी ५ सय ९६ जनाको स्वाब संकलन गरिएको छ ।
पछिल्लो २४ घण्टामा यस प्रदेशमा २७ जना व्यक्ति अस्पतालबाट डिस्चार्ज भएका छन् । डिस्चार्ज हुनेहरुमा धनुषाका १, सर्लाहीका १८ र बाराका ८ जना व्यक्तिहरु छन् ।
योसँगै हालसम्म यस प्रदेशमा सप्तरीका ३ सय ५४, सिरहाका १ सय ६६, धनुषाका ५ सय ८०, महोत्तरीका ३ सय ४४, सर्लाहीका ६ सय ५२, रौतहटका ७ सय ५०, बाराका १ सय ७० र पर्साका १ सय ९५ जना गरी ३ हजार २ सय ११ जना संक्रमितहरु डिस्चार्ज भई आ–आफ्नो घर फर्किसकेका छन् ।
प्रदेश २ मा हालसम्म पर्सामा १२, बारामा २, रौतहटमा २, महोत्तरीमा १, धनुषामा १ र सप्तरीमा १ जना गरी १९ जनाको कोरोना संक्रमणका कारण मृत्यु भइसकेको सामाजिक विकास मन्त्रालयले जनाएको छ ।
वि.सं.२०७७ साउन २० मंगलवार २०:४६ मा प्रकाशित
