Sansar News
२२ साउन, कपिलवस्तु । कपिलवस्तु जिल्ला कोरोना भाइरस(कोभिड–१९) को उच्च जोखिममा रहेसँगै जिल्ला प्रशासन कार्यालय कपिलवस्तुले कडाई गरेको छ ।
एकपछि अर्को गर्दै बैंक तथा वित्तिय संस्थाका कर्मचारीहरुमा कोरोना संक्रमण पुष्टि भएसँगै जिप्रका कपिलवस्तुले कडाई गरेको हो ।
सूचना जारी गर्दै जिल्लाप्रशासन कार्यालय कपिलवस्तुले बिहान ५ बजेदेखि बेलुका १२ बजेसम्म अत्यावश्यक सेवा बाहेकका सबै सरकारी कार्यालय, बैंक तथा वित्तीय संस्थाहरुबाट प्रदान गरिने सेवा पूर्ण रुपमा बन्द गरिने जनाएको छ ।
मालबाहक ढुवानीका साधन बाहेक जिल्ला भित्र संचालन हुने सार्वजनिक यातायातका सवारी साधनहरु पूर्ण रुपमा बन्द गर्ने र निजी सवारी साधानहरु जोर बिजोरमा संचालन हुने सूचनामा उल्लेख छ । यदि कसैले सूचनाको उल्घंन गरेको पाइएमा कार्वाही गरिने कडा चेतावनी दिएको छ ।
बिहिबारमात्र सदरमुकाम तौलिहवामा रहेको थप ३ वटा बैंक तथा वित्तीय संस्थाका ८ जना कर्मचारीमा कोरोना संक्रमण पुष्टि भएको छ ।
यसअघि ग्लोबल आईएमई बैंकका ३ जना, गुहेश्वरी मर्चेण्ट बैकिंग एण्ड फाइनान्स लि.का ४ जना कर्मचारीमा संक्रमण देखिएको थियो । संक्रमित देखिएका सबै वित्तिय संस्थाहरु सिल गरिएको छ ।
अब उक्त बैंकका सबैं कर्मचारीको पीसीआर परीक्षण गराएर अवस्था सामान्य नभएसम्म सेवा बन्द हुने जनाइएको छ ।
वि.सं.२०७७ साउन २२ बिहीवार १९:२८ मा प्रकाशित
