हामी सबैकाे संसारन्यूज

३२ साउन, दिल्ली । उत्तर प्रदेशका मन्त्री तथा पूर्वक्रिकेटर चेतन चौहानको कोरोनाका कारण मृत्यु भएको छ।

गुडगाउँको मेदान्त अस्पतालमा उपचाररत ७३ वर्षीय चौहानको आइतबार निधन भएको हो । स्वास प्रस्वासमा समस्या आएसँगै उनलाई शुक्रबारबाट भेन्टिलेटरमा राखेर उपचार गरिएको थियो ।

उनलाई जुलाई ११ मा कोरोना संक्रमण पुष्टि भएपछि उनी एसजीपीजीआईमा भर्ना भएका थिए। किडनी र रक्तचापको समस्या हुन थाले पछि उनलाई मेदान्त अस्पताल सारिएको थियो । त्यसैबीच पनि उनमा कोरोना पोजेटिभ देखियो ।

चौहनको अन्तिम संस्कार अष्ट्रेलियामा रहेका उनका जेठा छोरा आएपछि मात्र गरिने परिवारले जनाएको भारतीय संचारमाध्यमले समाचारमा उल्लेख गरेका छन् ।

चौहानले भारतको राष्ट्रिय टिमको ओपनर ब्याट्सम्यानका रुपमा खेलेका थिए। उनले भारतका लागि ४० टेस्ट र ७ एकदिवसीय खेल खेलेका थिए। टेस्टमा २०८४ रन जोडेका उनको उच्च स्कोर ९७ रन रहेको छ। १९९१ बाट खेल क्षेत्र छाडेर उनी राजनीतिमा प्रवेश गरेका थिए ।

यसअघि उत्तर प्रदेशकी मन्त्री कमला रानीको पनि कोरोना संक्रमणबाट मृत्यु भएको थियो।