हामी सबैकाे संसारन्यूज

काठमाडौं । सत्तारुढ दल नेपाल कम्युनिष्ट पार्टी (नेकपा)को सचिवालय बैठकले अध्यक्षद्वय केपी शर्मा ओली र पुष्पकमल दाहाल ‘प्रचण्ड’ले गठन गरेको कार्यदललाई अनुमोदन गरेको छ । सोमबार बिहान प्रधानमन्त्री निवास बालुवाटारमा बसेको सचिवालय बैठकले कार्यदललाई अनुमोदन गरेको प्रधानमन्त्री ओलीका सल्लाहकार सुर्य थापाले जानकारी दिए ।

‘अध्यक्षद्वयद्वारा गठित कार्यदलको बारेमा बैठकमा जानकारी गराइएको छ, कार्यदललाई बैठकले बधाई ज्ञापन र अनुमोदन गरेको छ, कार्यदलले प्रतिवेदन अध्यक्षद्वयसमक्ष प्रस्तुत गर्ने र बैठकमा आउनेछ’, थापाले जानकारी गराए ।

पार्टीभित्रको संकटलाई छिटोभन्दा छिटो पार लगाउनको गरि अघि बढ्न कार्यदललाई नेताहरुले सुझाव दिएका छन् । आजको बैठकमा सरकारका काम प्रभावकारी बनाउने र महाधिवेशनको तयारीमा जाने विषयमा छलफल भएको उनले बताए ।