हामी सबैकाे संसारन्यूज

काठमाडौं । सर्वोच्च अदालतले किशोर श्रेष्ठलाई प्रेस काउन्सिलको कार्यबाहक अध्यक्षबाट नहटाउन अन्तरिम आदेश जारी गरेको छ। बुधबार न्यायाधीश ईश्वर खतिवडाको एकल इजलासले श्रेष्ठलाई कार्यकारी अध्यक्षको जिम्मेवारीबाट हटाउने निर्णय कार्यान्वयन नर्गन र नियमावली संशोधन गर्न पर्नाका कारण पेश गर्न सरकारका नाममा अन्तरिम आदेश दिएको हो ।

सरकारले प्रेस काउन्सिल ऐन, २०४८ गत साउन २६ गते प्रेस काउन्सिल कार्य व्यवस्था नियमावलीमा संशोधन गर्दै कार्यवाहक अध्यक्ष तोक्ने अधिकार सरकारमा ल्याएको थियो । त्यसलगत्तै साउन ३२ गते सरकारले अधिवक्ता दुर्गा भण्डारी पौडेललाई प्रेस काउन्सिल सदस्यमा नियुक्ति दिँदै त्यसको एकदिनपछि भदौ १ गते राती कार्यवाहक अध्यक्षको जिम्मेवारीसमेत दिएको थियो ।

सरकारले भण्डारीलाई जिम्मेवारी दिने निर्णय गरेसँगै श्रेष्ठका तर्फबाट चेतनाथ धमलाले प्रेस काउन्सिल बोर्ड ऐन विपरीत श्रेष्ठलाई हटाएर भण्डारीलाई नियुक्त गरिएको भन्दै सर्वोच्च अदालतमा रिट हालेका थिए। सर्वोच्चले आदेशमा श्रेष्ठलाई कार्यबाहक अध्यक्षका रूपमा काम गर्न नरोक्नसमेत भनेको छ ।

सर्वोच्चले अन्तरिम आदेश दिएलगत्तै अब भण्डारीले कार्यवाहक अध्यक्षका रुपमा काम कारवाही गर्न पाउँदिनन् । यद्यपि प्रेस काउन्सिलको सदस्य पदमा रहेर काम गर्न भने उनलाई रोकिएको छैन ।