हामी सबैकाे संसारन्यूज

काठमाडौं । प्रधानमन्त्री केपी शर्मा ओलीको आधिकारिक फेसबुक पेजको प्रोफाइल फोटोमा ६ लाखभन्दा बढिले कमेन्ट गरेका छन् । पहिलो पटक प्रधानमन्त्री बनेको एक वर्ष पुरा भएको दिन अर्थात् २०१६ सेक्टेम्बर ११ मा राखिएको तस्बिरमा ६ लाख बढिले कमेन्ट गरेका हुन् ।

प्रधानमन्त्री ओलीको तस्बिरमा गरिएका अधिकांश कमेन्टमा निर्मला पन्तले न्याय नपाएको कुरा उल्लेख गरिएको छ । धेरै सामाजिक सञ्जाल प्रयोगकर्ताले फोटोको कमेन्टमा सरकार भ्रष्ट भएको र जनताले न्याय नपाएको कुरा बताएका छन् ।

कतिपयले प्रधानमन्त्री केपी शर्मा ओलीलाई ‘घुम्ने मेचमाथि अन्धो मान्छे’ भनेर पनि व्यंग्य गरेका छन् । समाचार तयार गर्दै गर्दासम्म गरिएका ६ लाख १ हजारबढि कमेन्टमध्ये अधिकांश कमेन्टमा प्रधानमन्त्री ओली र उनी नेतृत्वको सरकारप्रति निकै तिखो प्रश्न गरिएको छ ।

०७५ को साउन १० मा निर्मला पन्तको बलात्कार गरि हत्या गरिएको थियो । विभत्स रुपमा गरिएको हत्याको हालसम्म पनि सरकारले हत्यारा पत्ता लगाउन सकेको छैन् ।

ओली २०७४ फागुन ३ मा दोस्रो पटक प्रधानमन्त्रीमा निर्वाचित भएका थिए । उनी निर्वाचित भएको ६ महिनापश्चात भएको उक्त विभत्स हत्याको हालसम्म पनि हत्यारा पत्ता लगाउन नसक्दा सरकारको निकै आलोचना भएको छ ।

साथै प्रधानमन्त्री ओलीको दोस्रो कार्यकालमा भ्रष्टाचार र अनियमितता घटना व्याप्त देखिँदा जनता आक्रोशित भएका छन् । यसबीच अरबौंका दर्जनौं भ्रष्टाचारका काण्ड सार्वजनिक हुँदा पनि प्रधानमन्त्री ओली मुखदर्शक मात्रै बनेका छन् । जसको प्रतिक्रिया उनको तस्बिरमा आएको धेरैको बुझाई छ ।

प्रधानमन्त्री केपी शर्मा ओली संविधान जारीपश्चात भारतले लगाएको नाकाबन्दीको बीचमा २०७२ असोज २५ गते पहिलो पटक प्रधानमन्त्री पदमा निर्वाचित भएका थिए । नाकाबन्दीको बीचमा राष्ट्रियताको नारा दिँदै प्रधानमन्त्री भएका ओलीबाट आम जनताले निकै ठूलो अपेक्षा गरेका थिए । तर, दोस्रो कार्यकालको आधा समय पुरा हुँदै गर्दा पनि अपेक्षाकृत काम हुन नसक्दा आममा निराशा छाएको छ ।