हामी सबैकाे संसारन्यूज

१० भदौ, काठमाडौँ । उपप्रधान एवम् रक्षा मन्त्री ईश्वर पोखरेलले आफ्नो सम्बन्धको दुरूपयोग गरी कसैले पनि कुनै राजनीतिक पद नलिएको स्पष्ट पारेका छन् ।

सामाजिक सञ्जालमा यसबारे स्पष्ट पार्दै भनेका छन् ‘मेरो परिवारका कुनै सदस्य वा मेरा कुनै नाता सम्बन्धमा रहेका व्यक्तिहरूद्वारा पद वा मसितको सम्बन्धको दुरूपयोग गरी विद्यमान क़ानूनी व्यवस्थालाई उल्लंघन गरेर लाभ लिएको वा पद प्राप्त गरेको भन्ने विषयमा कुनै सत्यता छैन । भएका काम विधिसम्मत, पारदर्शितासहित र संस्थागत निर्णय प्रक्रियाका आधारमा मात्रै भएका छन् । कहींकतै पनि मेरो अबाञ्छित चासो वा हस्तक्षेप नभएको कुरा जानकारी गराउँदछु ।’

उनले आफ्नो दृढता र विश्वासलाई लाञ्छित गर्ने हिसाबले तथ्यहीन र अत्यन्त गलत मनसायका साथ सार्वजनिक भएका गरिएका कुराहरूप्रति खेद व्यक्त गर्दै कुनै पनि किसिमको भ्रममा नपर्न अनुरोध गरेका छन् ।

‘विगतमा राजाले सम्पूर्ण शासन सत्ता आफ्नो हातमा लिएको र त्यसविरूद्ध संघर्ष गरेका कारण यातनापूर्ण बन्दी जीवन विताइरहेका बेला सम्पूर्ण रूपमा बदनाम र चरित्रहत्या गर्ने हिसाबले “घरको पानी ट्यांकीमा पैसा राखेको“ कुप्रचार गरिएको र अहिले विगतको निरंकुश शाही शासनका तिनै दुष्ट मतियारहरू समेत नयाँ ढंगले म बिरूद्धमा स्वर उरालिरहेका छन्’ उनले उल्लेख गरेका छन् ।

उनले भनेका छन् ‘म ती सबैलाई चुनौती दिदै घृणापूर्वक अस्वीकार गर्दछु ।’