Sansar News
काठमाडौं । निषेधाज्ञाको बीच स्थानीय र गुठीयारहरुले रातो मछिन्द्रनाथको रथ तान्न थालेपछि ललितपुरको पुल्चोक क्षेत्रमा प्रहरीले हस्तक्षेप गरेको छ । प्रहरीले हस्तक्षेप गर्दा स्थानीय र प्रहरीबीच झडपसमेत भएको छ । अहिले उक्त क्षेत्र तनावग्रस्त छ ।
प्रहरीले रथ तान्न रोकेपछि स्थानीयहरु विरोधमा निस्किएका थिए । प्रहरीको अवरोधका बीच स्थानीयले रथ तान्न थालेपछि प्रहरीले भीडलाई पानीको फोहोरा प्रयोग गरेर तितरबितर गराएको थियो । प्रहरी हस्तक्षेपमा आक्रोशित स्थानीयले ढुंगा प्रहार गरेका थिए ।
स्थानीयहरुले रथलाई सडकको बीचमा पुर्याएका थिए । रथ अहिले सडक बीचमा छ । सडकमा ठूलो संख्यामा प्रहरी घेरा हालेर बसेका छन्।
मलमास अगाडि नै मच्छिन्द्रनाथलाई बंगुमती लग्नुपर्ने प्रचलनअनुसार स्थानीयले निषेधाज्ञा तोडेर रथ तानेको हुन् । गत वैशाख १८ र १९ मा तान्नुपर्ने रथ कोरोना महामारीका कारण रोकिएको थियो । निषेधाज्ञा भएपनि मलमास आउन लागेको भन्दै दबाब बढेपछि रथ तान्न सुरु गरिएको हो ।
वि.सं.२०७७ भदौ १८ बिहीवार १५:१८ मा प्रकाशित
