हामी सबैकाे संसारन्यूज

काठमाडौं । बिहिबारदेखि एक साताका लागि काठमाडौं उपत्यकाको निषेधाज्ञा थप खुकुलो भएको छ । काठमाडौं उपत्यकाका तीनै जिल्लाका प्रमुख जिल्ला अधिकारीहरुको बुधबारको बैठकले यस्तो निर्णय गरेको हो । गृह मन्त्रालयका अधिकारीहरुसँगको छलफलपछि निषेधाज्ञा खुकुलो बनाउने निर्णय गरिएको हो ।

जिल्ला प्रशासन कार्यालय काठमाडौंका सहायक प्रमुख जिल्ला अधिकारी जीवनप्रसाद दुलालले जानकारी दिएअनुसार आजको बैठकले उपत्यकाभित्र भोलीदेखि जोर बिजोरका आधारमा सवारी साधन सञ्चालन गराउने, खाद्यान्न पसलहरुलाई थप समय दिएर खोल्न दिने, अन्य व्यवसाय सञ्चालन गर्न बार ताेक्नेलगायतका निर्णय गरेकाे छ । भीडभाड हुने व्यवसाय तथा संस्थाहरु सञ्चालनमा भने प्रतिबन्ध कायमै रहेको दुलालले जानकारी दिए ।

उनका अनुसार आगामी भदौ ३१ सम्म यो व्यवस्था लागु हुनेछ । दुलालले जनाएअनुसार स्वास्थ्य सुरक्षाका मापदण्डलाई भने थप कडाई गरिनेछ ।

यसअघि उपत्यकाका जनप्रतिनिधिहरुले पनि नाकामा थप कडाई गर्दै उपत्यकाभित्रको स्थिति सहज बनाउन सुझाव दिएका थिए । यसबीचमा व्यवसायीहरुले पनि निषेधाज्ञा खुल्ला गरिनुपर्ने माग गर्दै आएका छन् ।