Sansar News
२७ भदौ, पर्वत । जिल्ला प्रशासन कार्यालय पर्वतले कुश्मा नगरपालिकाका ४ वटा वडामा निषेधाज्ञा जारी गरेको छ ।
भाद्र २६ गते कुश्मा नगरपालिकामा गरिएको स्वाव परीक्षणको नतिजामा कोभिड १९ देखिएकोले कन्ट्याक्ट ट्रेसिङमा थप सर्तकता अपनाउन भन्दै कुश्मा नगरपालिकाका ४, ५, ६ र ७ वडाका सम्पूर्ण क्षेत्रमा लागू हुने गरी प्रमुख जिल्ला अधिकारीबाट निषेधाज्ञा आदेश जारी भएको हो ।
उक्त आदेशमा भाद्र २६ राती १२ बजेदेखि आश्विन ३ गते रातीसम्मका लागि कायम हुने गरी निषेधाज्ञा जारी गरिएको उल्लेख छ ।
सो अवधिमा एम्बुलेन्स, खाद्य सामग्री, दूध, पानी लगायतका अत्यावश्यक सेवाका सवारी साधन सञ्चालन हुने छन् भने सार्वजनिक र नीजि यातायात सञ्चालनमा रोक लगाइएको छ । त्यस्तै शैक्षिक संस्था, सभा गोष्ठी, सभा सम्मेलन, सिनेमा हल लगायतमा पनि रोक लगाइएको छ ।
सो जिल्लाका आयोजनाहरुमा अन्य जिल्लाबाट कामदार ल्याउँदा आरडिटी र पिसिआर नेगेटिभ भएको हुनुपर्ने र निजहरुलाई आयोजनास्थल वा कार्यस्थलमै राखेर सम्पूर्ण स्वास्थ्य र सुरक्षा सम्बन्धी मापदण्ड पालना गराउनु पर्ने र सोको जानकारी सम्बन्धित पालिका वा जनप्रतिनिधिलाई समेत जानकारी गराउनु पर्ने आदेशमा उल्लेख छ ।
वि.सं.२०७७ भदौ २७ शनिवार २०:४५ मा प्रकाशित
