हामी सबैकाे संसारन्यूज

काठमाडौं । जनता समाजवादी पार्टी (जसपा)ले रेशम चौधरीको मुद्दा फेरि उठाएको छ । जसपाले चौधरीमाथि लागेको मुद्दा फिर्ता लिन माग गरेको छ ।

आइतबार एक विज्ञप्ती सार्वजनिक गर्दै जसपाले चौधरीलगायतका नेता कार्यमाथि लगाइएको मुद्दा खारेजीको समेत माग गरेको हो । जसपाका अध्यक्षद्वय महन्थ ठाकुर र उपेन्द्र यादवद्वारा हस्ताक्षरित विज्ञप्तीमा आन्दोलनमा सहभागी कार्यकर्तामाथि मुद्दा लगाएर जेल हालिनु दुःखत भएको बताइएको छ ।

‘टीकापुर नरसंहारका प्रमुख दोषीकारुपमा हाल जेलमा रहेका जसपाका सांसद रेशम चौधरीसहित नेता(कार्यकर्तामाथि सरकारले लगाएका मुद्दा खारेज गरी चौधरीलाई यथाशिघ्र रिहाई गरिनुपर्दछ,’ जसपाले भनेको छ।

०७२ भदौ २७ मा थरुहट आन्दोलनका क्रममा टीकापुरमा नेपाल प्रहरीका एसएसपीसहित ७ सुरक्षाकर्मी र एक बालकको ज्यान गएको थियो। उक्त नरसंहारको घटनामा रेशम चौधरीको मुख्य संलग्नता देखिएको ठहर गर्दै अदालतले सर्वस्वसहित जेल सजायँको फैसला गरेको थियो ।