Sansar News
स्याङ्जा – नेपाल कम्युनिष्ट पार्टी (नेकपा) फेदिखोला गाउँ पार्टी कमिटिको आयोजनामा रक्तदान कार्यक्रम सम्पन्न भएको छ । जनयुद्धका शहिद नारायण प्रसाद सुवेदीको स्मृतिमा रक्तदान कार्यक्रमको आयोजना गरिएको कार्यक्रमका अध्यक्ष खड्क रानाभाटले बताए ।
कार्यक्रममा नेपाल कम्युनिष्ट पार्टी (नेकपा)का अध्यक्ष सुर्यप्रसाद गैह्रे ‘पारस’ले पहिलो रक्तदातालाई ब्लड ब्याग हस्तान्तरण गरेका थिए । कार्यक्रममा बोल्दै प्रमुख अतिथी गैह्रेले समृद्धि र समाजबादको लागि शहिदहरुले देखाएको बाटोमा नै नेकपा निरन्तर रहेको र त्यो शहिदले देखेको सपना पुरा गर्नमा आफुहरु प्रतिवद्धताका साथ लागिपरेको बताए ।
शहिद नारायण सुवेदी दशवर्षे ससस्त्र जनयुद्धको क्रममा २०६० असोज २१ गते कैलालीमा नेपाली सेनाद्वारा मारिएका हुन् । कार्यक्रममा बोल्ने बक्ताहरुले शहिद सुवेदीले नेपाली आन्दोलनमा पुर्याएको योगदानवारे चर्चा गरेका थिए ।
कार्यक्रममा शहिद पत्नि मिलन सुवेदी, फेदीखोला गाउँपालिकाका प्रमुख तथा शहिद पुत्र घनश्याम सुवेदी र पार्टी जिल्ला सचिवालय सदस्य पुस्प बराल लगाएतले मन्तव्य राखेका थिए, कार्यक्रममा ५० जना सहभागीले रक्तदान गरेका थिए ।
वि.सं.२०७७ असोज २१ बुधवार १८:१९ मा प्रकाशित
