हामी सबैकाे संसारन्यूज

काठमाडौं । प्रधानमन्त्री केपी शर्मा ओलीले बढीगण्डकी आयोजनामा भ्रष्टाचार गरेको भन्ने आरोप निराधार भएको बताएका छन् । सुरु नै नभएको आयोजनामा भ्रष्टाचार भयो भन्नु गैरजिम्मेवार भएको उनको भनाई छ ।

‘निर्णय नभएको, कार्यआरम्भ नभएको, हुन्छ या हुँदैन, कसले गर्छ भन्ने टुंगो नभएको आयोजनामा पूर्वप्रधानमन्त्री र वर्तमान प्रधानमन्त्रीले यति अर्ब बाँडेर खाए भनेर गैरजिम्मेवार अभिव्यक्ति दिएकोसमेत सुनेको छु’, प्रधानमन्त्रीले भने, ‘यस्ता गैरजिम्मेवार र निराधार अभिव्यक्ति एउटा कुरा हो। तर हामी त्यस्तो गैरजिम्मेवार हुन सक्दैनौँ ।’

शुक्रबार प्रहरी दिवसको अवसरमा आयोजित कार्यक्रममा प्रधानमन्त्री ओलीले उक्त कुरा बताएका हुन् । जनतालाई गलत सूचना दिएर भड्काउने र गलत बाटोमा लैजाने काम गर्न नसक्ने उनले बताए।

पूर्वप्रधानमन्त्री डाक्टर बाबुराम भट्टराईले केही समयअघि प्रधानमन्त्री ओली, पूर्वप्रधानमन्त्री शेरबहादुर देउवा र पुष्पकमल दाहाल ‘प्रचण्ड’ले बुढीगण्डकी आयोजनाबाट ९ अर्ब घुस खाएको आरोप लगाएका थिए । जुन आरोपबारे प्रधानमन्त्री ओलीले पहिलो पटक सार्वजनिक अभिव्यक्ति दिएका हुन् ।