हामी सबैकाे संसारन्यूज

काठमाडौं । गृहमन्त्री रामबहादुर थापा ‘बादल’ले भूमिगत रुपमा सक्रिय रहेको नेत्र विक्रम चन्द ‘विप्लव’ नेतृत्वको समुहलाई निस्तेज पार्न प्रहरीलाई निर्देशन गरेका छन् । प्रहरी दिवसको अवसरमा शुक्रबार आयोजित कार्यक्रममा बोल्दै उनले विप्लव समुह सक्रिय हुन थालेको भन्दै निस्तेज पार्नुपर्ने बताएका हुन् ।

विप्लव समुहले भूमिगत रुपमा राजनीतिक आवरणमा चन्दा असुली गर्ने गरेको र विकास निर्माणमा अवरोध गर्ने गरेको उनको भनाई छ । उनले विप्लवविरुद्वको अभियानमा प्रहरीले कतै सम्झौता नगरी अगाडि बढ्ने विश्वास पनि व्यक्त गरे ।

‘संविधानको उपलब्धिलाई चुनौती दिँदै भूमिगत समूहले राजनीतिक आवरणमा चन्दा असुली, विकास निर्माणमा अवरोध र आमनागरिकका हक, अधिकार निर्भीकताका साथ प्रयोग हुने वातावरणमा अड्चन पैदा गर्ने कोशिस गरिरहेका छन्’, उनले भने, ‘त्यस्ता गठबन्धन र समूहलाई निस्तेज पार्न नेपाल प्रहरीले सूचना संकलन, विश्लेषण र फिल्ड अपरेसनमा कतै पनि सम्झौता गर्ने छैन भन्ने मेरो पूर्ण विश्वास छ ।’

मन्त्री थापाले त्यस्तो अभियानमा आफ्नो पूर्णं सहयोग रहने वचन पनि दिए । गृहमन्त्री थापाले भने, ‘अपराध र अपराधीको विषयमा मभन्दा यहाँहरु नै धेरै जानकार र व्यवसायिक हुनुहुन्छ। तसर्थ अपराधको प्रवृति विश्लेषण गरेर रणनीतिक रुपमा योजनावद्ध तरिकाले अगाडि बढ्नुस्, यहाँहरुलाई मन्त्रालयबाट उचित समन्वय र सहयोग उपलब्ध गराइने वचन दिन चाहन्छु ।’