हामी सबैकाे संसारन्यूज

३ कार्तिक, काठमाडौँ । सरकारले कोरोना संक्रमितको परीक्षण तथा उपचार आफै गर्नुपर्ने भनेपछि कांग्रेसका युवा नेता तथा पूर्वस्वास्थ्यमन्त्री गगन थापाले कडा प्रतिक्रिया जनाएका छन् । कोरोना संक्रमितले आफ्नो उपचार आफै गर्नुपर्ने सरकारको पछिल्लो निर्णय आएसँगै थापाले सामाजिक सञ्जालमार्फत यस्तो प्रतिक्रिया दिएका हुन् ।

https://www.facebook.com/thapagk/posts/3530146743695879

उनले सरकार आफ्नो जिम्मेवारीबाट पछि हटेको भन्दै सरकारले संक्रमितको संख्या गन्ने कामबाहेक केही नगरेको बताएका छन् ।
प्रधानमन्त्रीलाई व्यङ्गात्मक टिप्पणी गर्दै नेता थापाले सरकार स्वयं संक्रमित भएर आइसोलेसनमा रहेकोले अब उपरान्त संक्रमितको संख्या गन्नेबाहेक थप केही नगर्ने जानकारी गराइन्छ भनेर भनिदिनुस् भनेका छन् ।

थापाले लेखेका छन्, ‘स्वास्थ्य मन्त्रालयको पछिल्लो निर्णय ‘कोरोना संक्रमितले आफ्नो उपचार आफैं गर्नू ! यसरी हरेक दिन खुद्राखुद्रामा यस्तो निर्णय गर्नुभन्दा प्रधानमन्त्रीज्यू बरु सिधै भनिदिनुस् ‘सरकार स्वयं संक्रमित भएर आइसोलेसनमा रहेकोले अब उपरान्त संक्रमितको संख्या गन्नेबाहेक थप केही नगर्ने जानकारी गराइन्छ ।’

आइतबारको नियमित पत्रकार सम्मेलनमा स्वास्थ्य मन्त्रालयका प्रवक्ता डा. जागेश्वर गौतमले सरकारको पछिल्लो निर्णयबारे जानकारी गराउने क्रममा ‘ कोरोना परीक्षण र उपचार खर्च सरकारले नबेहोर्ने निर्णय सुनाएका थिए ।