हामी सबैकाे संसारन्यूज

काठमाडौं । सत्तारुढ नेपाल कम्युनिष्ट पार्टी (नेकपा)का दुई अध्यक्ष प्रधानमन्त्री केपी शर्मा ओली र पुष्पकमल दाहाल ‘प्रचण्ड’ कर्णाली प्रदेशसभाभित्रको विवाद मिलाउन सहमत भएका छन् । दुई अध्यक्षबीच विवाद समाधानका लागि केहि सहमती पनि भएको छ ।

प्रधानमन्त्री ओलीका प्रेस सल्लाहकार सुर्य थापाका अनुसार दुई अध्यक्षबीच कर्णाली विवाद समाधान गर्न विभिन्न ४ बुँदामा सहमती भएको छ । उनका अनुसार असन्तुष्ट पक्षले दर्ता भएको अविश्वास प्रस्ताव फिर्ता लिने छन् भने सत्तापक्षले विवाद चुलिएसँगै गरिएका कतिपय नियुक्तीका निर्णयहरु बदर गर्नेछन् ।

यस्ता छन् ४ बुँदे सहमती

१. कर्णाली प्रदेश संसदीय दलका प्रमुख सचेतक गुलाबजंग शाहलाई मुख्यमन्त्री महेन्द्रबहादुर शाहीले हटाउने निर्णय बदर गर्ने ।

२. प्रमुख सचेतकमा उहाँद्वारा नियुक्त सीता नेपालीको निर्णय बदर गरी पूर्ववत् रूपमा सचेतकमा कायम गर्ने ।

३. मुख्यमन्त्रीविरूद्द दर्ता भएको अविश्वास प्रस्ताव फिर्ता लिने ।

४. अन्य विषयहरूमा सल्लाह र समझदारीका साथ आवश्यक निर्णय लिने ।

प्रचण्ड र माधवबीच सहमती भएसँगै प्रस्ताव राेकिएकाे

गत असोज २५ मा मुख्यमन्त्री शाहीविरुद्व प्रधानमन्त्री ओली पक्षीय नेता यामलाल कँडेलको नेतृत्वमा अविश्वासको प्रस्ताव दर्ता भएको थियो । प्रदेशका सह–इन्चार्ज कँडेलको नेतृत्वमा नेकपाकै १८ सांसदले अविश्वासको प्रस्तावमा हस्ताक्षर गरेका थिए ।

शाहीविरुद्व एकाएक अविश्वासको प्रस्ताव दर्ताभएसँगै कर्णाली प्रदेशभित्र र सिंगो सत्तारुढ नेकपाभित्र विवाद देखिएको थियो । अध्यक्ष प्रचण्ड र वरिष्ठ नेता माधव कुमार नेपाल पक्षबीच सहमती भएसँगै अविश्वासको प्रस्ताव रोकिएको थियो ।

अविश्वासको प्रस्ताव रोकिएसँगै दुवै अध्यक्षले सत्तापक्ष र असन्तुष्ट पक्षलाई काठमाडौं बेलाएर परामर्श गरेका थिए । दुई अध्यक्षले बेग्लाबेग्लै परामर्श गरेसँगै विवाद समाधान गर्न सहमती भएको हो ।