हामी सबैकाे संसारन्यूज

कात्तिक ६, काठमाडौं । महान चाड दशैंको टिकाको दिन नजिकिएसँगै काठमाडौं उपत्यकाबाट बाहिरिनेहरुको संख्या बढेको छ । उपत्यकाबाट दशैं मनाउन घर फर्किनेहरुका कारण मुख्य नाकाहरुमा भीडभाड देखिन थालेको छ ।

कोरोना संक्रमणको जोखिमको समयमा पनि गाउँ फर्किनेहरुको भीडभाड देखिँदा घरमै सबै परिवारका सदस्य भेला भएर दशैं मनाउने चाहना धेरैमा रहेको बुझ्न सकिन्छ । यद्यपि यस वर्ष भने घर फर्किनेहरुको संख्या अघिल्लो वर्षको तुलनामा न्यून छ ।

अहिले काठमाडौं भित्रिने भन्दा बाहिरिने यात्रुको संख्या दोब्बर रहेको छ । हिजोको डाटाअनुसार ३२ हजार यात्रुले काठमाडौं छाडे भने १६ हजार भित्रिएका छन् भने विगत १० दिनदेखि काठमाडौंबाट बाहिरिनेहरुको संख्या हल्का बढ्दै गएको महानगरीय ट्राफिक प्रहरी महाशाखाले जनाएको छ ।

यद्यपि अघिल्ला वर्षको दशैंको तुलनामा यो संख्या अत्यन्त न्यून भएको छ । झण्डै सात महिना लामो लकडाउनकै अवधिमा धेरैजसो व्यक्तिहरुले काठमाडौं छाडेकाले यस वर्ष दशैंमा घर फर्किनेहरुको संख्या न्यून भएको हो । यात्रुहरुको संख्या कम भएकाले यस वर्ष अग्रिम टिकट बुकिङ पनि खुलाइएको छैन ।

सरकारले यस वर्ष कोरोना संक्रमणको जोखिम भएकाले जो जहाँ छ, त्यहीँ बसेर दशैं मनाउन आग्रह गरेको भएपनि कतिपय भने यात्रा गरिरहेका छन् । सरकारले सार्वजनिक गाडीमा यात्रा गर्नेहरुलाई फेस सिल्ड पनि लगाउन आग्रह गरेता पनि उचित ढंगबाट त्यसको पालना नभएको महानगरीय ट्राफिक प्रहरी महाशाखाले जनाएको छ ।