Sansar News
काठमाडौं । पार्टीभित्रको चरम विवादपश्चात सत्तारुढ नेकपाका अध्यक्षद्वय प्रधानमन्त्री केपी शर्मा ओली र पुष्पकमल दाहाल ‘प्रचण्ड’ छलफलमा जुटेका हुन् । नेकपा स्रोतका अनुसार दुई अध्यक्षबीच बिहिबार साढे १२ बजेदेखि प्रधानमन्त्री निवास बालुवाटारमा छलफल चलिरहेको छ ।
पार्टीभित्र विवाद उत्कर्षमा पुगेको बेला अध्यक्षद्वयबीच केहि दिनदेखि संवादसमेत हुन सकेको थिएन । गत शनिबारको दुई छलफलमा प्रधानमन्त्रीसमेत रहेका अध्यक्ष ओलीले सहमतीमा पार्टी फुटाउँ भन्ने प्रस्ताव राखेसँगै पार्टीभित्रको विवाद चरमतामा पुगेको थियो ।
त्यसयता नेताहरुबीच आरोप–प्रत्यारोपका विषय पनि सार्वजनिक भएका थिए । बुधबार एक कार्यक्रममा सम्बोधन गर्दै प्रधानमन्त्री ओलीले कुनै हालतमा आफुँले राजीनामा नदिने बरु सामना गर्ने बताएका थिए ।
गत भदौ २६ मा सम्पन्न स्थायी समिति बैठकले गरेको निर्णयविरुद्व प्रधानमन्त्री ओलीले विभिन्न नियुक्ती तथा निर्णय गर्न थालेपछि सत्तारुढ नेकपाभित्र विवाद देखिएको थियो । कर्णाली प्रदेशमा देखिएको विवाद र रअ प्रमुख सामन्तकुमार गोयलसँगको गोप्य भेटसँगै पार्टीभित्र पानी बाराबारको स्थिति आएको थियो ।
वि.सं.२०७७ कात्तिक २० बिहीवार १४:५८ मा प्रकाशित
