हामी सबैकाे संसारन्यूज

२० कात्तिक, काठमाडौं । स्याङजाको फेदीखोला गाउँपालिकाले मजदुर संचयकोष स्थापना गरेको छ । आफ्नो पालिकामा कार्यरत मजदुरहरुको लागि संचयकोष स्थापना गर्दै पालिकाले मजदूर संचयकोषमा सूचिकृत हुन पनि सम्बन्धित सबैलाई अनुरोध गरेको छ ।

गाउँपालिकाका अध्यक्ष घनश्याम सुवेदीका अनुसार मजदूर सूचीमा सुचिकृत भएका प्रत्येक मजदुरको बैक खातामा चौमासिक रुपमा गाउँपालिकाले १५ प्रतिशत रकम थप गर्नेछ । साथै प्रत्येक सूचिकृत मजदुरको परिवारलाई अनिवार्य स्वास्थ्य विमामा समावेश गर्ने छ । जसको नियम अनुसार तिनुपर्ने रकमको ५० प्रतिशत रकम गाउँपालिकाले मजदूरको नाममा निःशुल्क बेर्होने तथा मजदुर संचित रकम र स्वास्थ्य बिमामा ५० प्रतिशत निःशुल्क गाउँपालिकाको दायित्व हुने बताइएको छ ।

अध्यक्ष सुवेदीका अनुसार व्यक्तिगत तथा प्राइभेट कामका लागि नभएर हाललाइ सरकारका आयोजनाहरु जस्तै निर्माण कार्य लगायतका काममा खटिने मजदुरहरुका लागि मात्र यो मजदुर संचयकोष ल्याइएको हो । साथै यो कोष पालिकामा बसोबास गरिरहेका मजदुरहरुको हकमा मात्र लागु हुने बताइएको छ ।

उक्त मजदुर कोषमा प्रत्येक चार महिनामा उनीहरुको खातामा जम्मा गरेको रकम बराबर गाउँपालिकाले थप गरेर राखिदिने पनि अध्यक्ष सुवेदीले संसारन्युजलाई जानकारी दिएका छन् ।

त्यस्तै मजदुर कोषमा सूचिकृत भएका मजदुरका परिवारको स्वास्थ्य विमा पनि पनि गाउँपालिकाले नै गरिदिनेछ । त्यसमा ५० प्रतिशत रकम गाउँपालिका र ५० प्रतिशत मजदुर आफैले जम्मा गर्नुपर्ने छ ।

‘२ वर्षको पूर्ण तयारीपछि यो अभियानको थालनि गरेका हौं । अहिले यसका लागि प्रत्येक वडामा ५÷५ जना स्वयम्सेवकको टिम खटाएका छौं । अध्यक्ष सुवेदीले संसारन्युजसँग भने, ‘यस कार्यक्रमका बारेमा जानकारी दिँदै खाता खोल्ने तरिका सिकाउने लगायतका कामहरु भै रहेको छ । मजदुर साथीहरुले यसबारेमा बुझ्नु हुनेछ र सूचिकृत हुनुहुनेछ यो उहाँहरु र उहाँहरुको परिवारको हितको लागि थालिएको अभियान हो ।’

अध्यक्ष सुवेदीका अनुसार सो पालिकामा अहिले झण्डै १ हजार मजदुर रहेका छन् । उनीहरु यस मजदुर कोषमा सूचिकृत भएमा गाउँपालिकाबाट प्राप्त हुने सेवा सुविधाहरुमा पनि विशेष प्राथमिकता दिइने बताइएको छ ।

स्मरण रहोस, फेदिखोला गाउपालिकाले व्यवसायिक कृषि तथा स्वरोजगारी एवं अन्य सामाजिक सुरक्षाका सवालमा उदाहरण संप्रेषण गर्दै आएको छ । यो मजदुर कोष पनि संभवत ७५३ कै लागी अर्को उदाहरण हो ।