Sansar News
काठमाडौं । नेपाली कांग्रेसको शुक्रबारका लागि बोलाएको केन्द्रीय समिति बैठक अन्तिम समय स्थगित भएको छ । बिहिबार बसेको केन्द्रीय सदस्यसहितको पदाधिकारी बैठकमा पार्टी विवादबारे सहमती बन्न नसकेपछि स्थगित भएको हो ।
कांग्रेस केन्द्रीय सदस्य डा. डिला संग्रौलाले शुक्रबारका लागि बोलाइएको बैठक कात्तिक २४ सम्मको लागि सारिएको जानकारी दिइन् । उनका अनुसार आन्तरिक तयारी नपुगेको कारण बैठक सरेको हो ।
संग्रौलाअनुसार पार्टीभित्र कांग्रेस वरिष्ठ नेता रामचन्द्र पौडेल समुहले दर्ता गरेको विरोध पत्रबारे छलफल जारी छ ।
पौडेल समूहले सभापति शेरबहादुर देउवाले गरेका निर्णय विधानविपरीत रहेको भन्दै गत असोज १२ मा विरोधपत्र दर्ता गरेको थियो । कांग्रेसमा विभाग गठन, क्रियाशील सदस्यता वितरण, अन्य दलबाट आएका नेता९कार्यकर्ताहरुको समायोजन, भ्रातृ संस्थाको पदावधिलगायतमा विषयमा लामो समयदेखि विवाद छ ।
वि.सं.२०७७ कात्तिक २० बिहीवार १७:५५ मा प्रकाशित
