हामी सबैकाे संसारन्यूज

काठमाडौं । सत्तारुढ नेकपाको सचिवालय बैठक अघि पार्टी महासचिव विष्णु पौडेलले सक्रियता बढाएका छन् । उनले विवाद मिलाउन मध्यमार्गी उपायको खोजी गर्दै सक्रियता बढाएका हुन् ।

महासचिव पौडेलले विवाद मिलाउने उपाय स्वरुप मंगलबार नै दुई अध्यक्षसँग भेटघाट गर्दै छलफल पनि गरेका छन् । नेकपा स्रोतका अनुसार पौडेलले सचिवालय बैठक अघि विवाद मिलाउन दुवै अध्यक्ष सामु मध्यमार्गी प्रस्तावसमेत राखेको बुझिएको छ ।

महासचिव पौडेलले सचिवालय बैठकमा सहमती गरी एउटै कार्यसूची बनाउनुपर्ने दबाब दिएका छन् । उनले दुवै पक्षलाई आफ्नो अडान छाड्न पनि आग्रह गरिरहेको स्रोत बताउँछ ।

बैठक सारेरै भएपनि सहमती खोज्न पौडेलको प्रस्ताव

शुक्रबार केहि बेर बसेको सचिवालय बैठक भोली (बुधबार) बस्ने गरि स्थगित भएको थियो । जुन बैठकमा अध्यक्ष पुष्पकमल दाहाल ‘प्रचण्ड’सहितका नेताहरुले छलफलको लागि भन्दै १९ पाने प्रतिवेदन प्रस्तुत गरेका थिए ।

तर, प्रधानमन्त्री एंव पार्टी अध्यक्ष केपी शर्मा ओली भने उक्त प्रस्तावमाथि छलफल हुन नसक्ने भन्दै फिर्ता गरेर मात्र बैठक राख्नुपर्ने अडानमा छन् । प्रचण्ड पक्षीय नेताहरु बैठक हुनुपर्ने र ओली पक्षीय नेताहरु प्रतिवेदन फिर्ता पछि मात्रै बैठक राख्नुपर्ने अडान लिईरहेका बेला महासचिव पौडेलले बैठक सारेरै भएपनि सहमती खोज्न प्रस्ताव राखेका छन् ।

मंगलबार अध्यक्ष प्रचण्डसँगको छलफलमा पनि उनले पार्टी विवाद मिलाउन बैठक सार्नुपर्ने प्रस्ताव राखेको बुझिएको छ । उनले मंगलबार बिहान खुलमटारमा भएको भेटमा दुवै अध्यक्षको सहमतीमा मात्रै कार्यसूची बनाएर अगाडि बढ्नुपर्ने प्रस्ताव प्रचण्ड सामु राखेका छन् ।

नेकपाको पार्टी विधानमा पनि अध्यक्षद्वयको परामर्शमा महासचिवले बैठकको कार्यसूची तय गर्ने र बैठक बोलाउने व्यवस्था छ । जुन विवादको कारण हुनसकेको छैन् ।