हामी सबैकाे संसारन्यूज

२ मंसिर, काठमाडौं । सत्तारुढ नेपाल कम्युनिस्ट पार्टी (नेकपा) का कार्यकारी अध्यक्ष पुष्पकमल दाहाल प्रचण्ड राष्ट्रपतिलाई भेट्न शितल निवास पुगेका छन् ।

नेकपाका अध्यक्ष एवम् प्रधानमन्त्री केपी शर्मा ओलीले भोलि बुधबारका लागि बोलाइएको सचिवालय बैठक सार्न चाहेपछि नयाँ परिस्थितिबारे छलफल गर्न अध्यक्ष प्रचण्ड राष्ट्रपतिलाई भेट्न शितल निवास पुगेका हुन् ।

बालुवाटारमा बसेको प्रधानमन्त्री ओली, महासचिव बिष्णु पौडेल, उपप्रधानमन्त्री ईश्वर पोखरेललगायतको बैठक सकिएसँगै दाहाल राष्ट्रपतिलाई भेट्न शीतल निवास पुगेका हुन् ।

यसअघि मंगलबार महासचिव पौडेल आन्तरिक विवाद समाधानबारे छलफल गर्न  अध्यक्ष दाहाल निवास पुगेका थिए । उनले पार्टी कमिटी बैठकमा आपसी विवाद गरेर समस्या झन् जटिल बनाउनुभन्दा दुई अध्यक्ष र अन्य नेताहरूबीच छलफल गरेर समाधानसहित छलफल गर्नुपर्ने प्रस्तावका बारेमा प्रचण्डसँग छलफल गरेको बताइएको छ । तर अध्यक्ष प्रचण्डले भने सचिवालयको मितिसमेत तोकिसकेको हुँदा बैठकले नै मिति तोक्न सक्ने अहिल्यै सार्न नसकिने बताएको एक सचिवालय सदस्यले बताएका छन् ।

नेकपाको सचिवालय बैठक बुधबार दिउँसो १ बजे बोलाइएको छ । यसअघि कार्तिक २८ गते बसेको सचिवालय बैठकमा कार्यकारी अध्यक्ष प्रचण्डले अध्यक्ष ओलिका कार्यशैलीप्रति असहमति जनाउँदै १९ पेज लामो प्रतिवेदन पेश गरेका थिए ।