हामी सबैकाे संसारन्यूज

काठमाडौं । बुधबार बसेको नेकपा सचिवालय बैठकमा प्रधानमन्त्रीसमेत रहेका पार्टी अध्यक्ष केपी शर्मा ओलीले पार्टी एकता प्रक्रिया रोक्नुपर्ने प्रस्ताव राखेका छन् । ओली निकटका सचिवालय सदस्य एंव उपप्रधानमन्त्री ईश्वर पोखरेलका अनुसार बुधबारको बैठकमा उनले आफुँविरुद्व गरिएको आरोपहरुको छिनोफानो नगरी एकता प्रक्रिया अगाडि बढाउन सम्भव नहुने स्पष्ट पारेका हुन् ।

‘आरोपहरूको छिनोफानो नगरी पार्टी एकताको प्रकृयालाई अगाडि बढाउन सहज र संभव नहुने कुराको समेत उल्लेख गर्नुभएको छ, यो गंभीरतालाई पार्टी एकताको पक्षमा उभिनु भएका नेकपाका सबै तहका नेता, कार्यकर्ताहरूले बुझौं र त्यसै अनुसार आफूलाई तयार बनाऔं’, पोखरेलले सचिवालय बैठकबारे सामाजिक सञ्जालमा भनेका छन् ।

उनका अनुसार बुधबारको सचिवालय बैठकमा ओलीले आफुँविरुद्व लगाइएका आरोपहरु अस्वीकार गर्दै व्यवस्थित र सामग्रिक रुपमा खण्डन गर्नेसमेत बताएका थिए । पोखरेलले अगाडि भनेका छन्, ‘आफूमाथि लगाइएका “तथ्यहीन, आधारहीन, पार्टी एकतामा गंभीर रूपमा आँच पुर्याउने मनसाय र उद्देश्यबाट प्रेरित आरोपहरू” लाई आफूले अस्वीकार गर्ने र खारेज गर्ने उद्घोष गर्नुभएको छ केपी शर्मा ओलीले, सचिवालयको बैठकमा, त्यसको व्यवस्थित र सामग्रिक रूपमा खण्डन गर्ने कुराको समेत घोषणा गर्नुभएको छ, उहाँले ।’

पार्टीका कार्यकारी अध्यक्ष पुष्पकमल दाहाल ‘प्रचण्ड’सहितका ५ सचिवालय सदस्यले ओलीको कार्यशैलीप्रति असहमती जनाउँदै गत कात्तिक २८ मा बसेको सचिवालय बैठकमा १९ पन्ने प्रस्ताव छलफलको लागि अघि सारेका थिए । प्रचण्डसहितका सचिवालय सदस्यले प्रस्ताव अगाडि सारेसँगै ओलीले प्रस्वात फिर्ता लिनुपर्ने बताईरहेका थिए ।

ओलीको असहमतीका बीच बुधबार बसेको सचिवालय बैठकमा उनले आफुँविरुद्व राखिएको प्रस्तावको ‘काउण्टर प्रस्ताव’ ल्याउने भन्दै १० दिनको समयावधि मागेका छन् । जसको लागि सचिवालय बैठक मंसिर १३ सम्म स्थगित गरिएको छ ।