हामी सबैकाे संसारन्यूज

काठमाडौं । प्रधानमन्त्री केपी शर्मा ओलीका प्रमुख राजनीतिक सल्लाहकार विष्णु रिमालले आफ्नै पार्टीभित्रका विरोधी तत्वका कारण प्रधानमन्त्रीले काम गर्न नपाएको टिप्पणी गरेका छन् । सरकारको भूमिकाप्रति प्रश्नहरु उठिरहेको सन्दर्भमा उनले पार्टीभित्रका विरोधीले प्रधानमन्त्रीलाई काम नै गर्न नदिएको बताएका हुन् ।

उनका अनुसार प्रधानमन्त्रीलाई पार्टीभित्रका विरोधीले खुट्टा अल्झाएर राखेका छन् ।

‘जनताले दिने सबैथोक दिएका छन्। जनताले दिन बाँकी राखेको छैन। जनतासित हामीले गुनासो गर्ने ठाउँ छैन। जनताले झन्डै २ तिहाइ बहुमत दिएको छ’, एक अनलाईनसँगको कुराकानीमा रिमालले भने, ‘प्रधानमन्त्री स्वंयले कामै गर्न नचाहेको भए पनि हुन्थ्यो। तर बिहानदेखि बेलुकासम्म दौडिने १८ घन्टा खट्ने प्रधानमन्त्री हामीसँग हुनुहुन्छ। आफ्नै पार्टीले खुट्टामा अल्झाएर प्रधानमन्त्रीलाई अघि बढ्न नदिएको स्थिति छ। अब यसको अन्त्य हुनुपर्छ।’

एक अर्को प्रसङ्गमा बोल्दै उनले पार्टीलाई एकताबद्ध बनाउनका लागि प्रचण्डको प्रस्ताव फिर्ता हुनुपर्ने बताए । उनका अनुसार प्रचण्डको प्रस्ताव छलफलको लागि नै योग्य छैन् ।