हामी सबैकाे संसारन्यूज

काठमाडौं । उर्जामन्त्री एवं नेपाल कम्युनिष्ट पार्टी (नेकपा)का स्थायी समिति सदस्य वर्षमान पुन (अनन्त)ले युवाहरु सरकार र पार्टीको नेतृत्व लिन तयार रहेको बताएका छन् । सोमबार रोल्पा नगरपालिका–३, लाँकुरीस्थित विद्युत सबस्टेशनको उद्घाटन गर्दै उनले विधि र प्रक्रियागत रुपमा निर्णय गरे जिम्मेवारी लिन तयार रहेको बताए ।

‘दुवै अध्यक्षले प्रक्रियागत रुपमा निर्णय गर्नुस्, प्रधानमन्त्री र पार्टी अध्यक्ष पनि छाड्छौं भन्नुस्, हामी युवाहरु प्रधानमन्त्री र पार्टी अध्यक्ष दुवै चलाउन तयार छौं’, अनन्तले भने, ‘उहाँहरुलाई अभिभावकको रुपमा सम्मानित स्थान दिएर राख्छौं ।’

उनले आवेग र उत्तेजनामा भन्नुभन्दा विधि र प्रक्रियाबाट नेतृत्व हस्तान्तरण गर्नुपर्ने बताए । ‘बहससँगै नेतृत्व हस्तान्तरणको विषय उठेको छ,’ उनले भने ‘यो विषय आवेग र उत्तेजनामा होइन, विधि र प्रक्रियाबाटै नेतृत्व हस्तान्तरण गर्नुहोस् ।’

नेकपाभित्र देखिएको पछिल्लो अन्तरसंघर्षले पार्टीलाई थप एकिकृत र मजबुद बनाउने अनन्तको भनाई छ । उनले पार्टीभित्र हुने विवाद र छलफल स्वभाविक भएको बताए ।

पछिल्लो समय प्रधानमन्त्रीसमेत रहेका नेकपा अध्यक्ष केपी शर्मा ओलीले बुढा पुस्ताले नेतृत्व छोड्नुपर्ने र आफुँ पनि तयार रहेको कुरा बताएका थिए । जुन विषयमा बहस चल्दै गर्दा अनन्तले आफ्नो भनाइ सार्वजनिक गरेका हुन् ।