हामी सबैकाे संसारन्यूज

काठमाडौं । प्रधानमन्त्री केपी शर्मा ओली र राष्ट्रपति विद्यादेवी भण्डारीबीच भेटवार्ता भएको छ । राष्ट्रपति भण्डारीलाई भेट्न प्रधानमन्त्री ओली बिहिबार बिहान शीतलनिवास पुगेका थिए ।

राष्ट्रपति कार्यालयले जनाइएअनुसार भेटवार्ता करिब डेढ घण्टासम्म चलेको थियो । भेटवार्ता नियमित भएको राष्ट्रपति कार्यालयले जनाएको छ ।

नेकपाका अध्यक्षसमेत रहेको प्रधानमन्त्री ओलीले राष्ट्रपतिसँग गरेको भेटवार्तालाई अर्थपूर्णं रुपमा लिने गरिन्छ । खासगरी सत्तारुढ नेकपाभित्र विवाद आउँदा वा सरकार समस्यामा पर्दा प्रधानमन्त्री ओली राष्ट्रपतिसँग परामर्श लिन गईरहेका हुन्छन् ।

पछिल्लो समय नेकपाभित्रको आन्तरिक विवाद चरम अवस्थामा छ । प्रधानमन्त्री ओली अनुपस्थित भएसँगै बुधबार बोलाइएको सचिवालय बैठक पनि स्थगित भएको थियो । अर्को बैठक मंसिर २० मा बस्दैछ ।

आगामी रणनीति बनाउन प्रधानमन्त्री ओली परामर्शको लागि शितल निवास गएको धेरैको बुझाई छ ।