हामी सबैकाे संसारन्यूज

काठमाडौं । सत्तारुढ नेपाल कम्युनिष्ट पार्टी (नेकपा)का अध्यक्षसमेत रहेका प्रधानमन्त्री केपी शर्मा ओली र पार्टी उपाध्यक्ष बामदेव गौतमबीचको बैमनस्यता सामाजिक सञ्जालमा देखिएको छ । वैमनस्यता दुवैका प्रेस सल्लाहकारमार्फत सामाजिक सञ्जालमा छताछुल्ल भएको हो ।

बामदेवविरुद्व ओलीका सल्लाहकार सुर्य थापाले सामाजिक सञ्जालमा विष वमन गरेसँगै गौतमका प्रेस संयोजक विष्णुमणी सुवेदीले जवाफी प्रतिक्रिया दिएका छन् । जुन निकै आक्रामक खालको छ ।

ओलीका सल्लाहकार थापाले आइतबार बिहानै बामदेवको एक विवादित तस्बिर राख्दै ‘को कस्तो ? तस्बिर काफी छ !’ भन्ने टिप्पणी गरेका थिए । अर्थपूर्णं उक्त टिप्पणी सामाजिक सञ्जालमा निकै चर्चाको विषय बनेको थियो ।

जसको जवाफी प्रतिक्रियामा बामदेवका प्रेस संयोजक विष्णुमणी सुवेदीले थापाविरुद्व निकै आक्रामक अभिव्यक्ति दिएका छन् । उनले थापाको व्यक्तिगत तथा राजनीतिक जीवनमाथि नै गम्भिर खालका प्रश्नसमेत उठाएका छन् ।

जहाँ सुवेदीले सरकार र प्रधानमन्त्री ओली अलोकप्रिय हुनुको पछाडि थापाजस्ता पात्रको उपस्थिति रहेको टिप्पणी गरेका छन् । उनले ओलीका टिप्पणी अवाञ्छित हुनुको पछाडि थापाको हात रहेकोसमेत आरोप लगाएका छन् ।

किन भयो यस्तो दोहोरी ?

शनिबारको सचिवालय बैठकमा प्रधानमन्त्री ओलीको कार्यशैलीमाथि प्रश्न उठाउँदै गर्दा नेता गौतमले सल्लाहकारहरुको नामसमेत लिएका थिए । जहाँ उनले सल्लाहकारबाट सुर्य थापालाई हटाईनुपर्नेसमेत भनाई राखेका थिए ।

गौतमले सचिवालय बैठकमा त्यस्तो भनाई राखेसँगै ओलीका प्रेस सल्लाहकारले विवादित तस्बिरसहित प्रतिक्रिया सार्वजनिक गरेका हुन् । जहाँ ओलीको पनि बुझाई समेटिएको छ ।

शनिबारको सचिवालय बैठकमा बामदेव ओलीविरुद्व समेत उभिएका थिए । ओलीको अनिच्छा हुँदा हुँदै पनि सचिवालयले स्थायी समिति बैठक बोलाउने निर्णय गरेको थियो ।

यसबाहेक गौतम र सुर्य थापाबीच व्यक्तिगत दुश्मनी पनि छ । गौतमले २०७४ को निर्वाचनमा आफुँलाई हराउन थापाले भूमिका खेलेको भन्दै पार्टीमा उजुरी नै दर्ता गराएका छन् । जसमाथि हालसम्म कारबाही हुन सकेको छैन् ।