हामी सबैकाे संसारन्यूज

२१ मंसिर, काठमाडौं । प्रधानमन्त्रीका सल्लाहकार सूर्य थापामाथि यतिबेला सबैतिरबाट प्रहार भएको छ । नेपाल कम्युनिष्ट पार्टी (नेकपा) का उपाध्यक्ष बामदेव गौतमको बाटो काट्दै गरेको फोटो राखेर उनले ‘को कस्तो तस्बिर काफी छ’ भन्ने स्टाटस सामाजिक संजालमा राखेपछि सबैतिरबाट उनिमाथि प्रहार भएको छ ।

यहि विषयलाई लिएर उपाध्यक्ष गौतमका प्रेस सल्लाहकार विश्वमणि सुवेदी (विमसु) ले पनि सूर्य थापाको उक्त स्टाटसमाथि टिप्पणी गर्दै उनकै कारण प्रधानमन्त्री सबैतिरबाट बद्नाम हुनु परेको भन्दै उनलाई सम्मानित दर्जाबाट मुक्ति दिलाएर पार्टी र सरकारको इज्जत बचाउनु पर्ने बताएका छन् ।

‘०७४ को चुनावमा वामदेवलाई हराउन मतियारी गरेका आधार, प्रमाणसहित पार्टीमा उजुरी परेको छ । त्यसउपर कारवाही हुनुपर्छ भन्ने पुरानै माग फेरि फेरि दोहोरिने नै भयो । तर, त्यस्तो मान्छे प्रधानमन्त्रीको सल्लाहकार बनाएर राखिएको छ,’सामाजिक संजाल फेसबुकमा लेख्दै सुवेदीले भनेका छन ‘यो सरकार अलोकप्रियता हुनु, प्रधानमन्त्रीमाथि अवाञ्छित टिप्पणी हुनुको ठूलो हिस्सा त्यही सूर्यले ओगटेको छर्लङ्ग छ । कहिले ट्वीटर ह्याण्डलबाट प्रधानमन्त्रीलाई बद्नाम बनाउने, कहिले विभिन्न व्यक्तिमाथि टिप्पणी गर्दै प्रधानमन्त्रीलाई आलोचित बनाउने, दिनरात विभिन्न नियुक्तिका बार्गेनिङ चलाएर दलाली गर्ने र प्रधानमन्त्रीप्रतिको दृष्टिकोण खराब बनाउने यस्ता घटिया मान्छेलाई त्यो सम्मानित दर्जामा किन राखिएको हो ? यस्ता प्रश्न उठ्छन् नै । अनि, आफूबारे प्रश्न उठ्यो भनेर नेताविरुद्ध सामाजिक सञ्जालमा विष वमन गर्ने कि प्रश्नका जवाफमा लाग्ने ?’