Sansar News
काठमाडौं । नेत्रविक्रम चन्द ‘विप्लव’ नेतृत्वको नेकपाका नेता प्रेम दर्नाल रिहा भएका छन् । उनी सर्वौच्च अदालतको आदेशअनुसार आइतबार रिहा भएका हुन् ।
सर्वौच्च अदालतले बन्दी प्रत्यक्षीकरणको सुनुवाई गर्दै आइतबार उनलाई रिहा गर्न आदेश दिएको थियो । सर्वौच्चको आदेशपछि ललितपुर जिल्ला अदालतका श्रेस्तेदारको रोहबरमा उनलाई रिहा गरिएको हाे ।
तर, प्रहरी झुक्किएपछि पुनः पक्राउ परेनन्
अदालतको आदेशअनुसार रिहा भएका दर्नाललाई पुनः पक्राउ गर्न प्रहरी टोली अदालत परिसर बाहिर कुरेर बसेका थिए । तर, प्रहरीले प्रेम दर्नालको साटो उनका भाई प्रमेश दर्नाललाई पक्राउ गरेको छ ।
प्रहरी टोली झुक्किएपछि प्रेमका भाई प्रमेश दर्नाल पक्राउ परेका हुन् । प्रहरीले पक्राउ गरि भक्तपुर पुर्याएपछि दाई नभई भाई प्रमेश भएको थाहा पाएकाे थियाे ।
जनाइएअनुसार अहिले प्रमेशमाथि अभद्र व्यवहारको मुद्दा लगाई जिल्ला प्रशासन कार्यालय भक्तपुरबाट १० दिन म्याद थप गरि हिरासतमा राखिएको छ ।
विप्लव नेतृत्वको नेकपाका आर्थिक विभाग सदस्यसमेत रहेका प्रेम दर्नाल गत मंसिर ६ मा ललितपुरबाट पक्राउ परेका थिए ।
वि.सं.२०७७ मंसिर २९ सोमवार १९:२२ मा प्रकाशित
