हामी सबैकाे संसारन्यूज

३ पुस, काठमाडौं । बागमती प्रदेश दुग्ध विकास बोर्डले हेटौँडा उपमहानगरपालिका–१० शिसौघारीमा तत्कालै पाउडर दुग्ध प्लान्ट भवन निर्माण गर्ने भएको छ । प्लान्ट निर्माणका लागि अहिले बोलपत्र आह्वान गरेर निर्माण व्यवसायीको छनोट गरिएको जनाइएको छ ।

उक्त दुग्ध प्लान्ट भवनको केही दिनभित्रै निर्माण कार्य शुरु गरिने भएको बताइएको छ । प्रदेश सरकारको अनुदान रु ४१ करोड २२ लाख ७१ हजार ५१२ को लागतमा आगामी दुई वर्षभित्र निर्माण कार्य सम्पन्न गरेर धुलो दुध प्याकिङ गर्ने लक्ष्य रहेको प्रदेश दुग्ध विकास बोर्डका सूचना अधिकारी डा शत्रुघनप्रसाद साहले बताए ।

उनका अनुसार प्रदेश नं.२ को बारा, रौतहट, पर्सा र बागमती प्रदेशको मकवानपुर र चितवनका गरी करिब पाँच हजार ६०० कृषकबाट दैनिक साढे ६१ हजार लिटर दूध प्रदेश विकास वोर्डले खरिद गर्ने नीति लिएको छ ।

दुग्ध विकास बोर्डले कृषकबाट खरिद गरेको दूधलाई आधुनिक प्रविधिको माध्यमबाट पाउडर दूध प्याकिङ गरी स्वदेशका साथै विदेशी बजारमा खपतका लागि पठाइने कृषि, भूमि व्यवस्था तथा सहकारी मन्त्रालयका प्रवक्ता डा शरणकुमार पाण्डेले बताए । रासस