हामी सबैकाे संसारन्यूज

३ पुष, काठमाडौं । नेपाल कम्युनिष्ट पार्टी (नेकपा) का कार्यकारी अध्यक्ष पुष्पकमल दाहाल ‘प्रचण्ड’ ले प्रधानमन्त्री तथा पार्टी अध्यक्ष केपी शर्मा ओलीले अध्यादेश फिर्ता नलिए कडा कदम चाल्ने बताएका छन् ।

पेरिस डाँडामा शुक्रबार आयोजित १४ जिल्लाका नेकपा नेताहरुको भेलालाई सम्बोधन गर्दै अध्यक्ष प्रचण्डले संबैधानिक परिषद् सम्बन्धी अध्यादेश फिर्ता नलिए ओलीविरुद्ध थप एक्सनमा जाने बताएका छन् ।

अध्यक्ष प्रचण्डले अध्यादेश फिर्ता गर्ने पार्टी निर्णय अनसार कार्यान्वयनमा ढिलाई गर्न नहुने बताउँदै अध्यक्ष ओलीले पार्टी फुटाउने योजनासहित एकपछि अर्को कदम चालिरहेको र त्यसैको स्वरुप संबैधानिक परिषद् सम्बन्धी अध्यादेश रहेको बताएका छन् ।

१४ जिल्लाबाट केन्द्रीय समितिमा प्रतिनिधित्व गर्ने केन्द्रीय सदस्यहरु, पार्टीका जिल्ला अध्यक्ष तथा सचिवहरुको उपस्थिति रहेको सो भेलामा अध्यक्ष प्रचण्डले अध्यक्ष ओलीले पार्टी एकता विरुद्धमा गएर अपमान गर्ने, धोका दिने, गरेको भन्दै आफूलाई धोका दिँदै आएको आरोप समेत लगाएका थिए ।

त्यसैगरी भेलामा वरिष्ठ नेता झलनाथ खनालले दस्तावेजमा पुर्ण लोकतन्त्र भनिएपनि अध्यक्ष ओलीले एकलकाटे शैली अपनाएको आरोप लगाएका थिए । खनालले ओलीको यहि कार्यशैलीबाट देश नचल्ने आशय व्यक्त गरेको समेत बताइएको छ ।

त्यसैगरी अर्का वरिष्ठ नेता माधब कुमार नेपालले ओलीले पार्टीलाई बिभाजनतिर लैजान खोजेको भन्दै आफूहरुले पार्टीलाई फुटबाट जोगाउन लागिपरेको तथा सबैले आ–आफ्नो तहबाट पार्टीलाई एक बनाउन लाग्न भेलामा उपस्थित नेतालाई आग्रह गरेका थिए ।

नेकपामा आएको पछिल्लो विग्रह, संबैधानिक परिषद् सम्बन्धी अध्यादेश फिर्ता गर्ने कु्रामा प्रधानमन्त्रीले गरेको आलटाल लगायतका विषयमा केन्द्रीत रहँदै शुक्रबार १४ जिल्लाका नेकपा नेताहरु पेरिस डाँडामा भेला भएका हुन् ।