हामी सबैकाे संसारन्यूज

काठमाडौं । नेपाल पत्रकार महासंघले प्रधानमन्त्री केपी शर्मा ओलीले संसद विघटन गर्न गरेको सिफारिस कार्यान्वयन नगर्न राष्ट्रपति विद्यादेवी भण्डारीलाई आग्रह गरेको छ । आइतबार एक प्रेस विज्ञप्ती सार्वजनिक गर्दै महासंघले यस्तो आग्रह गरेको हो ।

पत्रकार महासंघका महासचिव रमेश विष्टद्वारा हस्ताक्षरित विज्ञप्तीमा प्रधानमन्त्री ओलीको निर्णयले नेपालको संविधान र संघीय लोकतान्त्रिक व्यवस्थामाथि गम्भीर बज्रपात गरेको बताइएको छ । यो कदम संविधान विरोधी रहेको विज्ञप्तीमा उल्लेख छ ।

‘सरकारद्वारा मंसिर ३० गते जारी संवैधानिक परिषद् नियुक्तिसम्बन्धी अध्यादेशको सर्वत्र विरोध र फिर्ता लिन दबाब भैरहेको अवस्थामा आज प्रधानमन्त्री केपी शर्मा ओलीले संसद् विघटन गर्ने सिफारिस गर्नुले नेपालको संविधान २०७२ र संघीय लोकतान्त्रिक गणतान्त्रिक शासन प्रणालीमाथि गम्भीर बज्रपात हुन पुगेको छֹ’ , विज्ञप्तीमा भनिएको छ, ‘प्रधानमन्त्री ओलीको यो कदम २०६२-०६३ को जनआन्दोलनको बलमा स्थापित संघीय लोकतान्त्रिक गणतान्त्रिक शासन व्यवस्था र संविधानसभाद्वारा जारी संविधानको व्यवस्थाविरुद्ध भएको नेपाल पत्रकार महासंघको ठहर छ ।’

महासंघले संसद विघटन गर्ने प्रधानमन्त्री ओलीको निर्णयको विरोध गर्न सम्पूर्णं लोकतन्त्रका पक्षधरलाई पनि आग्रह गरेको छ ।

प्रधानमन्त्री ओलीले आइतबार बिहान मन्त्रिपरिषदको आकस्मिक बैठक बोलाउँदै संसद विघटनको प्रस्ताव राष्ट्रपति समक्ष सिफारिस गरेका थिए ।