Sansar News
पुस ९, काठमाडौं । नेपाल कम्युनिष्ट पार्टी (नेकपा)को प्रचण्ड–नेपाल समुहले संसद विघटनविरुद्व देशव्यापी आन्दोलन गर्ने घोषणा गरेको छ । उक्त समुहको बिहिबार बसेको केन्द्रीय समिति बैठकले शुक्रबारदेखि नै देशव्यापी आन्दोलनमा उत्रिने घोषणा गरेको केन्द्रीय सदस्य उर्मिला अर्यालले जानकारी दिइन ।
बैठकले आन्दोलनको कार्यक्रम सञ्चालन गर्न प्रवक्तासमेत रहेका नेता नारायणकाजी श्रेष्ठको नेतृत्वमा आन्दोलन परिचालन समिति गठन गरेको छ । उक्त समिति दुई हजार पाँच सय १ सदस्यीय रहेको अर्यालले जानकारी दिइन् ।
त्यस्तै बैठकले भोली शुक्रबार माइतीघर मण्डलामा जम्मा भएर संयुुक्त पत्रसहित निर्वाचन आयोग जाने निर्णय पनि गरेको छ । शनिबार (११) गते ७ वटै प्रदेशमा सम्बन्धित प्रदेश कमिटीले र आइतबार (१२) गते ७७ जिल्लामा जिल्लास्तरीय भेला गर्ने पनि निर्णय भएको छ ।
बैठकले आगामी २० गतेसम्म सबै नगर तथा गाउँ र २५ गतेसम्म सबै वडा स्तरमा बैठक भेला गर्ने निर्णय पनि गरेको उनले जनाइन् ।
वि.सं.२०७७ पुस ९ बिहीवार १५:३८ मा प्रकाशित
