हामी सबैकाे संसारन्यूज

पुस १२, काठमाडौं । अखिल छैंठौंका अध्यक्ष बिमल पोखरेलले नेकपाका अध्यक्ष पुष्पकमल दाहाल ‘प्रचण्ड’को कार्यशैलीमाथि प्रश्न उठाएका छन् । उनले राष्ट्रपति विद्या भण्डारीलाई प्रतिगामी घोषणा गर्ने प्रचण्डले उनकै श्रीमान् मदन भण्डारीको शालिकमा माल्यार्पण गरेको प्रति प्रश्न उठाएका हुन् ।

पोखरेलले शालिक मदन भण्डारीको, चुनाव चिन्ह एमालेको र पार्टी कार्यालय एमालेकै चाहिने भए युद्ध किन गरेको भनि प्रश्नसमेत गरेका छन् ।

सामाजिक सञ्जालमार्फत उनले भनेका छन्, ‘श्रीमती विद्या भण्डारीलाई प्रतिगामी घोषणा गर्ने, बल्खु पुगेर श्रीमान मदन भण्डारीको शालिकमा माल्यार्पण गर्ने, तिनैले प्रतिपादन गरेको बहुदलीय जनवाद अमान्य हुने । शालिक मदन भण्डारीको, चुनाव चिन्ह त्यही एमालेको सूर्य र पार्टी कार्यालय पनि बल्खु नै चाहिने भएपछि १७ हजारको कत्लेआम किन गरिएको थियो ?’

प्रचण्डले फेरिएको शैलीबारे जवाफ दिनुपर्ने पोखरेलको भनाई छ । उनका अनुसार संसद विघटन गर्ने कुरामा प्रधानमन्त्री केपी शर्मा ओली जति जिम्मेवार छन् उत्तिकै रुपमा प्रचण्ड र माधव नेपाल पनि छन् ।

‘संसद विघटनको हदसम्म मात्रै ओली बढी जिम्मेवार छन्, बाँकी दुनियाँ वितण्डाको लागि प्रचण्ड र माधव नेपाल पनि उत्तिकै जिम्मेवार छन्’, उनले भनेका छन् ।