Sansar News
१७ पुष, हुम्ला । निः शुल्क रूपमा उपलब्ध हुनुपर्ने बैङ्क खाता सञ्चालनका लागि आवश्यक पर्ने नमुना दस्तखत कार्डको फोटोकपी गर्न ४० रुपियाँ लाग्ने गरेको छ । यहाँको सर्केगार्ड गाउँपालिकामा स्थापना भएको सिटिजन्स बैङ्कको शाखामा नमुना दस्तखत कार्ड सकिएको भन्दै फोटोकपी गर्न महँगो मूल्य तिर्नु परेको गुनासो सेवाग्राहीले गरेका छन् ।
बैङ्कमा खाता सञ्चालन गर्न निःशुल्क उपलब्ध हुनुपर्ने नमुना दस्तखत कार्डको फोटोकपीबाट काम चलाउनका लागि बैङ्क नजिकको फोटोकपी सेन्टरमा एकप्रतिको ४० रुपैयाँ तिर्नुपरेको सर्केगार्ड गाउँपालिका–३, उनापानी गाउँका धिरेन्द्र फडेराले बताए । सामाजिक सुरक्षा भत्ता बैङ्कमार्फत भुक्तानी गर्नुपर्ने व्यवस्था गाउँपालिकाले लागू गरेपछि उक्त खाता खोल्न सेवाग्राहीको घुइँचो लाग्ने गरेको छ ।
उनले किन यति महँगोमा दस्तखत कार्ड फोटोकपी गर्नुपरेको भनेर बैङ्क प्रशासनसँग सोधपुछ गर्दा कार्डको अभाव भएको जबाफ दिने बताए । शुक्रबारको गोरखापत्रमा प्रकाशित ।
वि.सं.२०७७ पुस १७ शुक्रवार १०:३६ मा प्रकाशित
