Sansar News
१९ पुष । नेपाली काँग्रेसका सभापति शेरबहादुर देउवाले निरञ्जन कोइराला (निरु)को निधनप्रति दुःख व्यक्त गरेका छन् ।
सामाजिक सञ्जालमार्फत दुःख व्यक्त गर्दै उनले निरंकुश पञ्चायती शासनका विरुद्ध प्रजातान्त्रिक आन्दोलन र राजनीतिमा सक्रिय कोइरालाको निधनको खवरले स्तव्ध भएको बताएका छन् ।
कोइरालाको निधनप्रति गहिरो दुःख व्यक्त गर्दै सभापति देउवाले शोक सन्तप्त परिवारजनमा पार्टी तथा व्यक्तिगत तर्फबाट हार्दिक समवेदना प्रकट गरेका छन् ।
नेपाली काँग्रेसका वरिष्ठ नेता रामचन्द्र पौडेलले पनि सामाजिकसञ्जालमार्फत कोइरालाको निधनमा दुःख व्यक्त गरेका छन । नेता पौडेलले कोइरालाको निधनले उनको परिवारलाई मात्रै नभई सिंगो पार्टीलाई नै अपुरणिय क्षति पुगेको बताएका छन् ।
नेपाली काग्रेसका केन्द्रीय सदस्य तथा प्रभावशाली नेता शेखर कोईरालाका सरोदर दाजु निरञ्जन कोइराला (निरु)को आज निधन भएको हो ।
कोभिड संक्रमण देखिएपछि भारतको नयाँ दिल्ली स्थित म्याक्स अस्पतालमा विगत १ महिनादेखि उपचाररत कोइरालाको आज बिहान ११ बजे निधन भएको हो ।
केशव कोइराला र नोना कोइरालाका सुपुत्र स्वर्गीय निरन्जन कोइराला निरंकुश पंचायती शासनका बिरुद्ध प्रजातान्त्रिक आन्दोलनमा सक्रिय भूमिका निर्बाह गरेका एक कुशल नेता थिए । उनी नेपालका पुराना र प्रतिष्ठित पर्यटन व्यवसायी समेत रहेका थिए ।
कोइरालाको निधनमा काँग्रेसका नेता कार्यकर्ताका साथै वरिष्ठ राजनीति, बुद्धिजीविहरुले दुःख व्यक्त गरेका छन् ।
वि.सं.२०७७ पुस १९ आइतवार १९:०२ मा प्रकाशित
