हामी सबैकाे संसारन्यूज

२१ पुस, काठमाडौं । काठमाडौं उपत्यकामा सोमबारदेखि उच्च वायु प्रदूषण बढेपछि वातावरण विभागले आवश्यक काम बाहेक घरबाहिर ननिस्कन अनुरोध गरेको छ ।
काठमाण्डौंमा बिहान र बेलुका उच्च बायु प्रदूषण बढेकाले आवस्यक काम बाहेक बाहिर ननिस्कन र विशेष सावधानी अपनाउन विभागले अनुरोध गरेको हो ।

विभागले मंगलबार एक प्रेस विज्ञप्ति जारी गर्दै भनेको छ, ‘पुष २० गतेदेखि मौसममा आएको बदलावसँगै काठमाडौं उपत्यकामा वायु प्रदूषण बढेको पाईएको छ । यसबाट तपाई हाम्रो स्वास्थ्यमा नकारात्मक असर पार्दछ ।’

विशेष गरी बालबालिका, वृद्धवृद्धा र दम खोकी जस्ता श्वास प्रश्वास सम्बन्धी विरामी र मुटुका बिरामीहरु बढी प्रभावित हुने भएकाले उनीहरुलाई सकेसम्म घरबाहिर ननिस्कन र सबै नागरिक घरबाहिर निस्कदा बिशेष सावधानी अपनाउन पनि विभागले अनुरोध गरेको छ ।

त्यस्तै काठमाडौं बाहेक तराइ क्षेत्रका शहरहरु नेपालगन्ज र विराटनगर क्षेत्रका नागरिकले पनि विशेष सावधानी अपनाउन अनुरोध गर्दै विभागले भनेको छ, ‘वायु प्रदूषण मौसममा पनि भर पर्ने भएकाले मौसम यस्तै भइरहेमा केही समयसम्म प्रदूषण यस्तै रहन अथवा खराव समेत हुने सम्भावना रहेकोले विशेष सावधानी अपनाउन अनुरोध गरिन्छ ।’ विभागले भनेको छ ।