हामी सबैकाे संसारन्यूज

पुस २६, काठमाडौं । नेकपाका अध्यक्षद्वय पुष्पकमल दाहाल ‘प्रचण्ड’ र माधवकुमार नेपालले निर्वाचन आयोगमा बुझाएका सबै कागजपत्र माग गरेका छन् । सोमबार निर्वाचन आयोग पुगेर प्रचण्ड र नेपालले पार्टी एकतापछि बुझाएका सबै कागजात उपलब्ध गराउन माग गरेका हुन् ।

‘पार्टीको आधिकारिकतासँग सम्बन्धित विषयमा टुंगो लगाउन किन समस्या पर्यो भनि बुझ्न गएका थियौं’ आयोग पुगेका नेकपाका स्थायी समिति सदस्य लिलामणी पोखरेलले भने, ‘पार्टी एकतापश्चातका बुझाएका सबै कागजपत्रको प्रतिलिपि दिन माग गरेका छौं, उहाँहरुलाई पनि समस्या नहोस् र हामीलाई पनि जवाफ दिन सहज होस् भनेर ।’

पोखरेलले जनाएअनुसार आयोगका पदाधिकारीले पार्टीसँग सम्बन्धीत विवाद कानून बमोजिम नै गर्ने जवाफ दिएका छन । ‘हामीले कानूनले आदेश दिए बमोजिम गर्ने हो, हामीले कानून, विधि र व्यवस्थाभन्दा बाहिर केही गर्दैनौं भन्ने जवाफ उहाँहरुले दिनुभएको छ’, पदाधिकारीहरुको भनाई उद्धत गर्दै पोखरेलले भने ।

उनले अदालतबाट टुंगो नलागेसम्म निर्वाचनसम्बन्धीत सबै कार्यक्रम स्थगन गर्न पनि आफुँहरुले आयोगसँग माग गरेको जानकारी दिए । ‘प्रतिनिधि सभा विघटनको विषयमा अदालतमा बहस चलिरहेको छ, अदालतमा बहस चलिरहेको बेला निर्वाचनका कार्यक्रम अगाडि बढाउन कहिँबाट पनि मिल्दैन्’, पोखरेलले भने, ‘अदालतबाट टुंगो नलाग्दासम्म प्रक्रिया अगाडि नबढाउन पनि पत्र दिएका छौं, उहाँहरुले बुथ र मतदाताबारे मात्रै जानकारी लिएको भन्ने जवाफ दिनुभएको छ ।’

नेकपा विभाजनपश्चात साबिक नेकपाको दुई तिहाई (३१५) सदस्य आफुँसँग रहेको प्रचण्ड–नेपाल पक्षको दाबी छ । प्रचण्ड–नेपाल पक्षले यसअघि साबिक नेकपा २९५ केन्द्रीय सदस्यको हस्ताक्षरसहित आफुँहरु आधिकारिक भएको दाबी गर्दै निर्वाचन आयोगमा पत्र बुझाएको थियो ।

तर, निर्वाचन आयोगले भने अद्यावधिक सुधारसहितको विवरण दिन भन्दै गत बिहिबार नेकपाको दुवै पक्षलाई एक साताको म्यादसहित पत्र पठाएको थियो । जसपश्चात प्रचण्ड–नेपाल समुह निर्वाचन आयोग पुगेको हो ।

प्रचण्ड–नेपाल समुहले ओली पक्षले विस्तार गरेको केन्द्रीय समितिलाई आयोगले स्वीकार गरेको प्रति प्रश्न उठाउँदै आएको छ ।