Sansar News
पुस २८, काठमाडौं । अमेरिकी संसदमा भएको हिंसात्मक घटनालाई लिएर ट्विटरले ७० हजार एकाउण्टलाई निलम्बन गरेको छ । अन्तराष्ट्रिय सञ्चार माध्यमले जनाएअनुसार घटनालाई लिएर ट्विटरले हालका राष्ट्रपति डोनाल्ड ट्रम्पसहित उनका ७० हजार समर्थकको एकाउण्ट निलम्बन गरेको हो ।
जनाइएअनुसार ट्विटरले हिंसात्मक घटनालाई प्रचार गर्न खोज्ने एकाउण्टहरुलाई निलम्बन गरेको हो । ट्विटरले यसबारे आफ्नो आधिकारिक एकाउण्टमार्फत जानकारी पनि दिएको छ ।
हिंसात्मक घटना लगत्तै फेसबुक र इन्स्टाग्रामले पनि हिंसात्मक घटनालाई प्रचार गर्ने एकाउण्टहरुलाई बन्द गरिदिएको थियो ।
संसद घटनामा परि ५ जनाले ज्यान गुमाएका थिए
गत बुधबार अमेरिकी संसदमा भएको हिंसात्मक घटनामा पनि ५ जनाको ज्यान गएको थियो । घटनामा एक प्रहरी र चार ट्रम्प समर्थकले ज्यान गुमाएका थिए ।
नवनिर्वाचित राष्ट्रपति जो बाइडेनको जितलाई प्रमाणित गर्न बसेको संसद बैठकलाई अवरुद्ध गर्न ट्रम्प समर्थकले संसदलाई कब्जा गर्ने प्रयास गरेका थिए । जुन मुडभेडमा गोली चल्दा ज्यान गएको हो ।
वि.सं.२०७७ पुस २८ मंगलवार १२:२३ मा प्रकाशित
