Sansar News
पुस २९, काठमाडौं । नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टीका नेता धर्मेन्द्र बास्तोला पक्राउ परेका छन् । विप्लव नेकपाको अन्तराष्ट्रिय विभाग प्रमुखसमेत रहेका उनलाई बुधबार प्रहरीले ललितपुरको बागमती गाउँपालिकाबाट पक्राउ गरेको हो ।
नेकपा उच्च स्रोतले जानकारी दिएअनुसार प्रहरीले धर्मेन्द्रसहित अन्य तीन जनालाई पनि पक्राउ गरेको हो । जनाइएअनुसार पक्राउ पर्नेमा विप्लव नेकपाका नेताहरु प्रकाश शाही, विवेक कुमाल र विश्वास छन् ।
प्रहरीले भने धर्मेन्द्र पक्राउ परेको विषयमा जानकारी नभएको बताएको छ ।
पक्राउ परेका धर्मेन्द्र बास्तोला विप्लव नेतृत्वको नेकपाका पाँच मुख्य नेतामध्येका एक हुन् । नेकपामा विप्लवसहित खड्गबहादुर विश्वकर्मा ‘प्रकाण्ड’, हेमन्तप्रकाश वली ‘सुदर्शन’, धर्मेन्द्र बास्तोला ‘कञ्चन’ र सन्तोष बुढामगरसहितको ५ सदस्यीय स्थायी समिति थियो ।
प्रतिबन्धपश्चात सुदर्शन पक्राउ परेसँगै नेकपाको स्थायी समिति ४ सदस्यीय बनेको थियो । बास्तोलाको पक्राउसँगै नेकपामा मुख्य तीन नेता बाँकी छन् ।
बास्तोलाले नेकपाको अन्तराष्ट्रिय विभागसँगै पश्चिम कमाण्डको नेतृत्व पनि गर्दै आएका थिए ।
वि.सं.२०७७ पुस २९ बुधवार १६:३२ मा प्रकाशित
