Sansar News
माघ १, काठमाडौं । प्रधानमन्त्री केपी शर्मा ओलीले निर्वाचन आयोगभित्र नयाँ चलखेल सुरु गरेका छन् । नेकपाको आधिकारिक पक्ष कुन हो भनेर बहस चलिरहेको बेला आयोगमा कर्मचारीहरुको सरुवा गर्दै नयाँ चलखेल सुरु गरेका हुन् ।
ओलीले नेकपा विवाद हेरिरहेका लक्ष्मीप्रसाद गौतमको सरुवा गरिदिएका छन् । गौतमलाई अहिले कानून आयोगमा पुर्याइएको छ ।
गौतमको ठाउँमा सहसचिव पुष्कर सापकोटालाई ल्याइएको निर्वाचन आयोगले जनाएको छ । उनी ओली समर्थकको रुपमा पहिचान बनाएका कर्मचारी हुन् ।
आयोगमा अहिले नेकपाको आधिकारिकता र सूर्य चिन्ह कसले पाउने भन्ने विवादमा बहस चलिरहेको छ । जुन विवादमा ओली र प्रचण्ड–नेपाल पक्षले आ–आफ्नो दाबी राखेका छन् ।
प्रचण्ड–नेपाल पक्षले साबिक नेकपाको केन्द्रीय समितिको झण्डै दुई तिहाई सदस्यको हस्ताक्षर बुझाएको छ भने ओलीले पार्टी विभाजनपछि केन्द्रीय समितिलाई पुनर्गठन गर्दै समिति १५ सय १ सदस्यीय बनाउँदै बहुमत आफ्नो पक्षमा रहेको दाबी गरेका छन् ।
ओलीको नियतमाथि शंका र षडयन्त्र देखियो – योगेश भट्टराई
कर्मचारी सुरुवा गरिएको विषय प्रचण्ड–नेपाल पक्षका नेता योगेश भट्टराईले ओलीले नयाँ षडयन्त्र गर्न खोजेको टिप्पणी गरेका छन् । मंगलबार राती ट्विट गर्दै उनले एकाएक कर्मचारीको सरुवा गरिनुमा षडयन्त्र देखिएको बताए ।
‘निर्वाचन आयोगमा नेकपाको आधिकारिकता सम्बन्धित बहस चलिरहेको अवस्थामा आयोगका वरिष्ठ कर्मचारीको सरुवा गरिएको बुझिएको छ, नियतमाथि शंका, षड्यन्त्रको आभास’, उनले भनेका छन् ।
वि.सं.२०७७ माघ १ बिहीवार १२:५५ मा प्रकाशित
