हामी सबैकाे संसारन्यूज

माघ १ गते, काठमाडौं । संसद विघटन गर्ने प्रधानमन्त्री केपी शर्मा ओलीको कदमविरुद्व कांग्रेसले आगामी माघ ३ गते शनिबार देशव्यापी प्रदर्शन गर्ने भएको छ । कांग्रेसको सूचना, सञ्चार तथा प्रचार विभागले जनाएअनुसार कांग्रेसले आगामी शनिबार ७ सय ५३ स्थानीय तह स्तरमै विरोध प्रदर्शन गर्ने भएको हो ।

कांग्रेसले माघ ३ को प्रदर्शनको लागि नारा पनि तय गरेको छ । ‘जुटौं संसद विघटनको असंवैधानिक कदमका विरुद्वमा ! उठौं लोकतान्त्रिक संविधान रक्षाका पक्षमा !’, कांग्रेसको नारा छ ।

संसद विघटनसँगै निर्वाचन घोषणा गर्ने सरकारको निर्णयमा कांग्रेस विभाजित छ । कांग्रेसका सभापति शेरबहादुर देउवा पक्ष निर्वाचनको पक्षमा भने देखिएका छन् । तर, कांग्रेसभित्रको रामचन्द्र पौडेल पक्ष भने संसद विघटन र निर्वाचन दुवैको विपक्षमा देखिएका छन् ।

तथापि, कांग्रेसले आन्दोलनका कार्यक्रमलाई भने निरन्तर अगाडि बढाईरहेको छ ।