हामी सबैकाे संसारन्यूज

माघ २, काठमाडौं । सरकारले ‘नागरिक एप’लाई परिक्षण प्रसारणको रुपमा सार्वजनिक गरेको छ । शुक्रबार पत्रकार सम्मेलनमार्फत सरकार प्रवक्ता एवं सूचना तथा प्रविधि मन्त्री पार्वत गुरुङले एपको बिटा भर्सन सार्वजनिक गरेका हुन् ।

‘सञ्चार र सूचना प्रविधिको टेवा, हात हातमै सरकारी सेवा’ भन्ने नारासहित सार्वजनिक गरिएको एपबाट सहज रुपमा सरकारी सेवा लिन सकिने गुरुङले जानकारी दिए । ‘सरकारका सबै सेवालाई डिजिटलाईज गरी सबै सेवालाई एकै प्लेटफर्मबाट दिने उद्देश्यले एपको सुरुवात गरिएको हो’ मन्त्री गुरुङ्गले भने, ‘यसबाट पानदेखि नागरिकता, राहदानी, शैक्षीक प्रमाणपत्र र मतदाता प्रमाणपत्रबारे पनि सेवा लिन सकिनेछ ।’

उनले जानकारी दिएअनुसार एपबाट नागरिक लगानी कोष र सामाजिक सुरक्षा कोषमा भएको आफ्नो खाताबारे पनि जानकारी लिन सकिनेछ । हेलो सरकारलाई गुनासो गर्न एपबाटै सकिने उनले जनाए ।

विदाको दिन पनि एपबाट सरकारी सेवा लिन सकिने मन्त्री गुरुङले जानकारी दिएका छन् । उनका अनुसार एपमा आगामी दिनमा मालपोत, भूमिसुधार, चालक अनुमती पत्रलगायत सेवाहरु पनि थप हुनेछ । अहिले परिक्षणको रुपमा मात्रै अगाडि बढाइएको उनले बताए ।

एप प्रयोगबारे सरकारले छिट्टै नै कार्यविधि ल्याउने गुरुङले जानकारी दिएका छन् । एपले दुरदराजका नागरिकलाई निकै सहज हुने उनको भनाई छ ।