Sansar News
माघ ४, काठमाडौं । निर्वाचन आयोगले राजनीतिक पार्टीहरुलाई छलफलका लागि बोलाएको छ । आयोगका प्रवक्ता राजकुमार श्रेष्ठका अनुसार आगामी निर्वाचन, मतदाता नामावली, मतदान स्थल तथा मतदान केन्द्रका बारेमा छलफल गर्न सर्वदलीय बैठक बोलाइएको हाे ।
अहिले बैठक निर्वाचन आयोगकाे कार्यालयमा जारी रहेकाे जनाइएकाे छ ।
आयोगले निर्वाचनको तयारीका विषयमा छलफल गर्न नेकपाका दुवै समूह, नेपाली कांग्रेस, जनता समाजवादी पार्टी, राष्ट्रिय प्रजातन्त्र पार्टीलगायत दलहरूलाई दुई–दुई जना प्रतिनिधि छलफलका लागि पठाउन पत्र काटेको थियो ।
प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले गत पुस ५ गते प्रतिनिधिसभा विघटन गरी आउँदो बैशाख १७ र २७ गते मध्यावधि निर्वाचन घोषणा गरेकी थिइन् । सरकारले संसद विघटनसँगै प्रतिनिधिसभा निर्वाचनको मिति तोकेपछि निर्वाचन आयोगले निर्वाचनको तयारी थालेको हो ।
तर, दलहरुले भने प्रतिनिधि सभा विघटनविरुद्व सर्वोच्चमा परेको रिटमाथि फैसला भएपछि मात्रै निर्वाचनको तयारी थाल्न आग्रह गर्दै आएका छन् ।
वि.सं.२०७७ माघ ४ आइतवार १३:२७ मा प्रकाशित
