Sansar News
६ माघ, काठमाडौं । भारतको गुजरातमा सुतिरहेका मजदूरमाथि ट्रक चल्दा १५ जनाको मृत्यु भएको छ ।
गुजरातको सुरतबाट ६० किमी टाढा रहेको कोसांबा क्षेत्रमा ट्रकले ठक्कर दिँदा घटनास्थलमै १२ जना र अस्पतालमा उपचारका क्रममा ३ जना गरी १५ जनाको मृत्यु भएको भारतीय संचार माध्यमले जनाएका छन् ।
भारतीय प्रहरीका अनुसार सोमबार राति किम–मान्डबी रोडमा भएको उक्त घटनामा फुटपाथमा सुतिरहेका मजदूरमाथि ट्रक चलेको थियो । उनीहरु राजस्थानको बासबान्डा जिल्लाको कुशलगढका मजदुर रहेका थिए ।
उक्त घटनामा १ वर्षीय बालक र २ वर्षीया बालिकाको पनि ज्यान गएको बताइएको छ ।
ट्यांकरसँग ठोक्किएर अनियन्त्रित भएको ट्रक फुटपाथमा चढ्दा उक्त घटना भएको बताइएको छ । घटना पश्चात ट्रकका ड्राइभर र खलासीलाई नियन्त्रणमा लिइएको बताइएको छ ।
वि.सं.२०७७ माघ ६ मंगलवार ११:१९ मा प्रकाशित
