हामी सबैकाे संसारन्यूज

माघ ९, काठमाडौं । प्रधानमन्त्री केपी शर्मा ओली पक्षीय नेकपाका युवा नेता रमेश पौडेलले पुष्पकमल दाहाल प्रचण्डको न्यायालय र निर्वाचन आयोगप्रति गरिएको टिप्पणीप्रति आपत्ति जनाएका छन् । उनले न्यायालय र निर्वाचन आयोगमा सेटिङ्गसहितको आरोप लगाएर धम्की दिनु लज्जास्पद भएको बताए ।

पौडेलले भरतपुर महानगर र सिरहामा भएको निर्वाचनलाई नबिर्सन पनि प्रचण्डलाई आग्रह गरेका छन् । उनले भरतपुरमा गन्दागन्दैको भोट चपाएपछि र सिराहामा बत्ती निभाएर मत पेटिका फेरिएको घटनालाई के भन्ने भनि प्रश्न उठाएका छन् ।

‘छोरीलाई चुनाव जिताउन चितवनमा गन्दागन्दैको तीन भोट चपाएपछी स्थगित भएको मतगणनालाई पुन निर्वाचन गर्नु भनेर आदेश गर्न लगाउदा तेहि अदालत स्वतन्त्र न्यायालय थियो हैन कमरेड ? हिजो सिरहामा बत्ती निभाएर मत पेटिका फेर्दा त्यही निर्वाचन आयोग महान थियो हैन कमरेड ?’, पौडेलको प्रश्न छ, ‘आज चाही त्यही न्यायालय र निर्वाचन आयोगलाई अबिश्वास सहित सेटिङ्गको आरोप लगाएर धम्की दिन र सडक आन्दोलन गर्दा दुनियाँले के भन्छ होला कमरेड ?’

उनले प्रचण्ड–नेपाल पक्षले सडकमा गरिरहेको आन्दोलनको अर्थ के हो भनि प्रश्न पनि गरेका छन् ।