Sansar News
माघ ११, काठमाडौं । प्रतिनिधि सभा विघटनसम्बन्धी राजपत्रमा छापिएको सूचनाको आधिकारिकता जाँच्न माग गर्दै सर्वोच्चमा निवेदन परेको छ । आइतबार प्रचण्ड–नेपाल पक्षका नेताहरु देव गुरुङ, कृष्णभक्त पोखरेल, रामकुमारी झाँक्रीलगायतले निवेदन गरेका हुन् ।
प्रतिनिधि सभा विघटनविरुद्व दायर रिटमाथिको सुनुवाईका क्रममा कानून व्यवसायीहरुले राजपत्रमा छापिएको सूचनाको बारेमा प्रश्न उठाएका थिए । गत बिहिबार सुनुवाईको क्रममा अधिवक्ता ओमप्रकाश अर्याल र टीकाराम भट्टराईले प्रतिनिधि सभा विघटनको सूचना राजपत्रमा प्रकाशित नगरिएको बताएका थिए ।
जसपश्चात इजलासले राजपत्रमा प्रकाशित सूचना माग गरेको थियो । जुन सूचना रातारात प्रकाशित गरि गत माघ ९ गते (शुक्रबार)को इजलासमा महान्यायाधिवक्ता अग्नि खरेलले पेस गरेका थिए ।
पुरानै मिति अर्थात् पुस ५ को मितिमा प्रकाशित गरिएको सूचनामाथि आधिकारिकताको प्रश्न उठेको हो । गत माघ ९ मा राजपत्रको वेभसाईटमा अपलोड भएको सूचनाको मिति पुरानै पुस ५ को राखिएको छ ।
याे पनि..
सरकारबाटै किर्ते, अदालतमा प्रश्न उठेपछि रातारात छापियो राजपत्रमा सूचना
वि.सं.२०७७ माघ ११ आइतवार १२:१८ मा प्रकाशित
