हामी सबैकाे संसारन्यूज

१३ माघ, काठमाडौं । नेपाल इन्फ्रास्ट्रक्चर बैंकको आईपीओ आगामी शनिबारसम्म बाँडफाँट गरिने भएको छ । निफ्राको आईपीओ निष्काशन तथा बिक्री प्रवन्धको जिम्वेवारी एनआइबीएल एस क्यापिटलले पाएको हो ।

क्यापिटलका अनुसार आगामी शुक्रबार नै बाँडफाँटका लागि आवश्यक तयारी भइरहेको र सकेसम्म शुक्रबार नै बाँडफाँट गर्ने साथै त्यो दिन नभ्याए शनिबार बाँडफाँट गर्ने तयारी रहेको छ ।

बैंकले ८ अर्ब रूपैयाँ बराबरको ८ करोड कित्ता सेयर प्रारम्भिक निष्कासन गरेको थियो । ८ करोडमध्ये १ लाख ६० हजार कित्ता कर्मचारीका लागि र ४ लाख कित्ता म्यूचअल फण्डका लागि जानेछ । बाँकी ७ करोड ५८ लाख ४० हजार कित्ता साधारण सेयर भने सर्वसाधारणका लागि छुट्याइएको थियो ।

आईपीओमा माग भन्दा २.३९ गुणा बढी आवेदन परेको छ । आईपीओमा १५ लाख २९ हजार ४६० जना आवेदकले १८ अर्ब १२ करोड ८६ लाख ७२ हजार रुपैयाँको १८ करोड १२ लाख ८६ हजार ७२० कित्ताको लागि आवेदन दिएका छन् । आवेदनका आधारमा हेर्दा रितपूर्वक आवेदन दिएकाहरुलाई औसतमा ५० कित्ता सेयर पर्ने देखिएको छ ।

यद्यपि, कति आवेदन स्वीकृत हुन्छ र कतिले ५० कित्ता भन्दा कमका लागि आवेदन दिएका छन् त्यसले पनि कति कित्ता पर्ला भन्ने अहिले नै भन्न सकिने अवस्था छैन ।