हामी सबैकाे संसारन्यूज

माघ १८, काठमाडौं । ‘श्री ५ को सरकार’ भनेकोप्रति खानेपानी मन्त्री मणि थापाले माफी मागेका छन् । आइतबार सामाजिक सञ्जालमार्फत उनले भुलबस श्री ५ को सरकार प्रयोग भएको भन्दै माफी मागेका छन् ।

‘शनिबार नेपाल कम्युनिष्ट पार्टीले सुर्खेतमा आयोजना गरेको कार्यकर्ता भेलालाई सम्बोधन गर्ने क्रममा नेपाल सरकार भन्नुपर्नेमा भुलवस अन्यथा भएको र त्यसलाई मैले तत्कालै सच्याएको यहाँहरु जानकार नै हुनुहुन्छ’, सामाजिक सञ्जालमा उनले भनेका छन् ।

शनिबार सुर्खेतको वीरेन्द्रनगरमा आयोजित विभाजित नेकपाको ओली पक्षीय भेलालाई सम्बोधन गर्ने क्रममा मन्त्री थापाले ‘नेकपा स्थायी समिति र श्री ५ को सरकारको तर्फबाट…’ भनि सम्बोधन गरेका थिए । जस लगत्तै उनले ‘ए सरी नेपाल सरकारको तर्फबाट म स्वागत गर्नै चाहन्छु’ भनि आफ्नो भनाई सच्याएका थिए ।

मन्त्री थापाको उक्त सम्बोधनतर्फ चौतर्फी आलोचना र व्यंग्य भईरहेको छ । गणतन्त्र आएको एक दशकपश्चात उनले गरेको यस्तो सम्बोधनलाई अर्थपूर्णं भनि कतिपयले टिप्पणीसमेत गरेका छन् ।

जसबारे माफी माग्दै उनले भुलबस शब्दको प्रयोग भएको बताएका छन् । उनले अगाडि भनेका छन्, ‘आम नेपाली नागरिक, मेरो शुुभचिन्तक र नेपाल कम्युनिष्ट पार्टीका नेता कार्यकर्तामा त्यसबारे कुनै दुविधा नराखिदिनुहुन अनुरोध गर्दछु । मेरो पुरै राजनीतिक जिवन, क्रान्ति र परिवर्तनमा विताएको र पश्चगमनका पक्षमा मेरो साथ नहुने कुरा विनम्रताका साथ अनुरोध गर्दछु । भुलबस ती शब्द प्रयोग हुन गएकोमा क्षमा चाहन्छु ।’